Դի Կանիոն կարող է գլխավորել «Սանդեռլենդը»

Պաոլո Դի Կանիոն բանակցություններ է վարում «Սանդեռլենդի» հետ, որի գլխավոր մարզչի պաշտոնը այս պահին թափուր է:

Ինչպես հայտնի է, շաբաթօրյա «Մանչեսթեր Յունայթեդի» հետ հանդիպումից հետո, որում մանկունյանցիները հաղթեցին 1-0 հաշվով, «կատուների» սեփականատեր Էլլիս Շորտը Մարտին Օնիլին ցույց տվեց դռան կողմը: Այդ օրվանից էլ ակումբը նոր մարզչի փնտրտուքների մեջ է:

Այժմ հայտնվել է տեղեկատվություն, որ այդ պաշտոնը կարող է ստանձնել 44-ամյա Դի Կանիոն, ով փետրվարին հեռացվել էր Առաջին լիգայի «Սուինդոն» ակումբի գլխավոր մարզչի պաշտոնից’ ղեկավարության հետ տարաձայնությունների պատճառով: Այս մասին հայտնում են անգլիական հեղինակավոր ԶԼՄ-ները:

Վերջերս իտալացի մասնագետը կարող էր հայտնվել նաև «Ռեդինգում», սակայն այդ ակումբը որոշեց վստահել Նայջլ Էդկինսին, ով իր դեբյուտային խաղում 1-4 հաշվով զիջեց «Արսենալին»: