«Բավարիա»-«Բարսելոնա»` 4:0. «Բավարիան» մեկ ոտքով եզրափակչում է (տեսանյութ)

Չեմպիոնների լիգայի կիսաեզրափակիչ փուլի առաջին խաղով Մյունխենի «Բավարիան» «Ուեմբլիում» հանդես գալու մեծ քայլ կատարեց: Գերմանական ակումբը սեփական հարկի տակ 4:0 հաշվով վստահ առավելության հասավ «Բարսելոնայի» նկատմամբ, որի խաղն այսօր շատ հեռու էր բարձրակարգ կոչվածից:

Հանդիպման հաշիվն առաջին խաղակեսի 25-րդ րոպեին Դանտեի փոխանցումից հետո բացեց Թոմաս Մյուլլերը: Րոպեներ էին անցել երկրորդ խաղակեսի մեկնարկից, երբ Մարիո Գոմեսը կրկնապատկեց իր թիմի առավելությունը: 73-րդ րոպեին Արիեն Ռոբենը դարձավ իր թիմի երրորդ գոլի հեղինակը, սակայն սա դեռ վերջը չէր…Մյուլլերն աչքի ընկավ նաև 82-րդ րոպեին` ձևակերպելով այս խաղի վերջնական հաշիվը` 4:0:

Դե ինչ, սպասենք պատասխան հանդիպմանը «Նոու Կամպում»: Տեսնենք` կատալոնացիները կկարողանան վերգտնել ուժերը և պայքարել եզրափակչի ուղեգրի համար: