«Ռեալը» մնաց առանց տիտղոսների. «Ատլետիկոն»` Իսպանիայի գավաթակիր (տեսանյութ)

Իսպանական և առհասարակ ֆուտբոլի սիրահարներն այսօրվա խաղին երկար էին սպասել: «Սանտյագո Բեռնաբեուն» ընդունեց մադրիդյան դերբին. Արքայական գավաթը վիճարկում էին «Ռեալն» ու «Ատլետիկոն»:

Ինչպես և սպասվում էր` խաղը դինամիկ ու լարված էր հենց սկզբից: 14-րդ րոպեին Կրիշտիանու Ռոնալդուն բացեց հաշիվը: Ռոնալդուի գոլից հետո հակառակորդն անընդհատ գրոհում էր ու արդյունքում Դիեգո Լոպեսը տեղի տվեց 35-րդ րոպեին. խաղի հաշիվը հավասարեցրեց Դիեգո Կոստան: Հաշիվն առաջին խաղակեսում այլևս չփոխվեց:

Ընդմիջումից հետո դաշտում գերլարված պայքար էր: Ռոնալդուն լավ հնարավորություններ ունեցավ «Ատլետիկոյի» դարպասը գրավելու համար, սակայն կամ դարպասաձողն էր փրկում կամ դարպասապահը: Երկրորդ խաղակեսի միջնամասում մրցավարի հետ վիճաբանելու համար դաշտից հեռացվեց  «Ռեալ Մադրիդի» գլխավոր մարզիչ Ժոզե Մոուրինյոն: Թիմը պայքարը ստիպված էր շարունակել առանց մարզչի:

Խաղի հիմնական ժամանակահատվածում և մրցավարի ավելացրած 4 րոպեների ընթացքում հաշիվը չփոխվեց, և հերթը հասավ լրացուցիչ ժամանակին:

98-րդ րոպեին «Ատլետիկոյի» ֆուտբոլիստ Միրանդան դարձավ իր թիմի երկրորդ գոլի հեղինակը: Ավելացված ժամանակի երկրորդ 15 րոպեների վերջնամասում Կրիշտիանու Ռոնալդուն մրցակցին հարվածելու համար կարմիր քարտ ստացավ ու հեռացվեց խաղադաշտից: Միջադեպը «Ռեալի» խաղացողներին վեճի առիթ տվեց: Թիմերի ներկայացուցիչները բախվեցին իրար:

Խառնաշփոթ իրավիճակը հաշվի մեջ նոր փոփոխություններ չառաջացրեց, և «Ատլետիկոն» նվաճեց Իսպանիայի գավաթը…«Ռեալն» այս մրցաշրջանում մնաց առանց տիտղոսների: 

Մոուրինյոյի ժամանակաշրջանը, կարծես, վերջնականապես ավարտվեց…