Կրիշտիանու Ռոնալդու. Ես հեռախոս չունեմ

Մադրիդի «Ռեալի» և Պորտուգալիայի հավաքականի առաջատարը, կարծես, հոգնել է ՖԻՖԱ-ի նախագահ Զեպ Բլատերի արդեն հանրահայտ դարձած խոսքը մեկնաբանելուց:

Այսօր պորտուգալացին իսպանական «Marca» պարբերականի կողմից արժանացել է նախորդ մրցաշրջանում Իսպանիայի առաջնության լավագույն ֆուտբոլիստի կոչմանը: Մրցանակաբաշխությունից հետո Ռոնալդուն պատասխանել է ԶԼՄ ներկայացուցիչների հարցերին: «Marca» պարբերականի մեջբերած հարցազրույցից մեկ հատված ներկայացնում ենք ձեր ուշադրությանը:

-Որոշ ժամանակ առաջ ՖԻՖԱ-ի նախագահն ամբողջ աշխարհի առջև ծիծաղելի տպավորություն թողեց’ փորձելով ծաղրել Ձեզ: Ի վերջո նա Ձեզ զանգահարե՞լ է: Եթե այո, ապա ի՞նչ է ասել:

-Ես հեռախոս չունեմ: Իմ քարտուղարն ունի մեկ հեռախոս, բայց ոչ ես: Ես հեռախոս չեմ օգտագործում:

-Եվ ոչ ոք երբեք կապ չի՞ հաստատել Բլատերի հետ:

-Ոչ: Նման բաներն ինձ համար չեն:

-Պատրաստվում ենք մեկնել Ցյուրիխ’ «Ոսկե գնդակի» հանձնման արարողությանը:

-Ինձ համար կարևոր է այն, որ վայելում եմ «Marca»-ի մրցանակը: Շնորհակալ եմ Ալֆրեդո դի Ստեֆանոյին, ով եկել է այստեղ ինձ մրցանակ տալու համար: Այդ փաստն ինձ շատ է երջանկացնում: Դա այն է, ինչն ինձ համար այս պահին նշանակություն ունի:

Հիշեցնենք, որ շաբաթներ առաջ Զեպ Բլատերը, համեմատելով Կրիշտիանու Ռոնալդուին և Լիոնել Մեսսիին, նախապատվությունը տվել էր արգենտինացուն և նշել էր, որ Ռոնալդուն դաշտում իրեն հրամանատարի պես է պահում: