«Բարգավաճ Հայաստան»-ի ներկայացուցիչը եթերի չեկավ

 FM107 ArmRadio-ի եթերում այսօր Հրանտ Մելիք-Շահնազարյանի հեղինակային հաղորդաշարի հյուրը՝ ԲՀԿ քաղխորհրդի անդամ Տիգրան Ուրիխանյանը եթերի չներկայացավ: Ինչպես նախորոք հայտարարվել էր, Տ.Ուրիխանյանի հարցազրույցը պետք է կայանար 19:00-ին: Սակայն նշված ժամին ռադիոկայանի եթերում հնչում էին տարբեր հաղորդումներ և երաժշտություն:

«Տիգրան Ուրիխանյանը եթերից 40 րոպե առաջ զանգահարել և զգուշացրել էր, որ օրը անց է կացրել ՀՀ մարզերից մեկում և հնարավոր է այդ պատճառով 10-15 րոպե ուշանա: Ռադիոկայանի ղեկավարությունը ընդառաջեց ինձ և թույլ տվեց հաղորդումը սկսել ուշացումով և բաց թողնված ժամանակահատվածը լացնել 19:30-ից հետո եթեր դուրս եկող հաղորդումների հաշվին: Սակայն խոստացված ժամին Ուրիխանյանը նույնպես չներկայացավ: Փոխարենը մեզ զանգահարեց նրա գրասենյակի աշխատակիցներից մեկը և ասաց, որ Ուրիխանյանը կարող է գալ 20:15-ից 20:30-ն ընկած ժամանկահատվածում: Այդ ժամին հաղորդումը, բնականաբար, չէր կարող կայանալ»,- Times.am-ին ասել է Հրանտ Մելիք-Շահնազարյանը:

Վերջինս նաև տեղեկացրել է, որ Տ.Ուրիխանյանի գրասենյակի աշխատակիցները խնդրել են հարցազրույցը կազմակերպել ապրիլի 27-ից հետո: