Հայաստանում խորհրդարանական ընտրություններին անդրադարձել է նաև Ռուսական Առաջին ալիքը:
Ռեպորտաժում նշվում է, որ մայիսի 6-ին կայանալիք ընտրություններին մնացել է երկու շաբաթ, և որ քաղաքական ուժերը ակտիվորեն լծված են նախընտրական քարոզարշավին:
Հեռուստաընկերությանը տված հարցազրույցում Հանրային կարծիքի ուսումնասիրության համառուսաստանյան կենտրոնի գլխավոր տնօրեն Վալերի Ֆյոդորովը ասել է, որ ընտրարշավի առաջատարներն են Հանրապետական և «Բարգավաճ Հայաստան» կուսակցությունները: Ֆյոդորովը ներկայացրել է նաև վերջին հարցման արդյունքները: Ըստ այդմ՝ առաջատարը ՀՀԿ-ն է՝ 39% ձայներ ստանալու հավակնությամբ, այնուհետև ԲՀԿ-ն ՝ 36% հնարավոր ձայներով:
Փորձագետը նաև նկատել է, որ ՀՀԿ-ի քարոզարշավը դրական է ընթանում, և վստահությունը գնալով ավելանում է այս կուսակցության նկատմամբ, այնինչ երկրորդ տեղում ընթացող կուսակցությունը փոքր-ինչ իջեցրել է իր արդյունքները: Դա, ըստ Վ.Ֆյոդորովի, վերջին շրջանում ԲՀԿ-ի հետ կապված սկանդալների հետևանքն է:
