Աշխարհի «աղմուկն» ու Ադրբեջանի «խլությունը»
Նմանատիպ
Նախօրեի երեկոյան մի շարք երկրներ Լաչինի միջանցքում ստեղծված իրավիճակի մասին հայտարարություններով են հանդես եկել։ Այսպես ԱՄՆ պետքարտուղարության ներկայացուցիչ Նեդ Փրայսը հայտարարել է, որ Լաչինի միջանցքի փակումը լուրջ հումանիտար հետևանքներ ունի և հետ է մղում խաղաղության գործընթացը։ «Մենք կոչ ենք անում Ադրբեջանի կառավարությանը վերականգնել միջանցքով ազատ տեղաշարժը։ Առաջ գնալու ճանապարհը բանակցությունների միջոցով է», – Թվիթերում գրել է Փրայսը։
Հայտարարություն է տարածել նաև ԵՄ մամուլի ծառայությունը։ «ԵՄ-ն կոչ է անում Ադրբեջանի իշխանություններին ապահովել միջանցքով տեղաշարժի ազատությունն ու անվտանգությունը՝ համաձայն 2020 թվականի նոյեմբերի 9-ի եռակողմ հայտարարության: Նման ազատ տեղաշարժի սահմանափակումները զգալի անհանգստություն են պատճառում տեղի բնակչությանը և առաջացնում հումանիտար մտահոգություններ: Այլ մտահոգությունները կարող են և պետք է լուծվեն ներգրավված կողմերի հետ երկխոսության և խորհրդակցությունների միջոցով»,- նշված է ԵՄ հայտարարության մեջ։
Լաչինի միջանցքով «առանց որևէ պայմանի Լեռնային Ղարաբաղը մատակարարելու» կոչով է հանդես եկել նաև Ֆրանսիյի ԱԳՆ-ն։ Իսկ Ռուսաստանի նախագահ Վ. Պուտինն անձամբ է ներգրավվել իրավիճակը կարգավորելուն ուղղված գործընթացին՝ հեռախոսազրույց ունենալով Ադրբեջանի և Հայաստանի ղեկավարների հետ։
Սակայն Ադրբեջանը շարունակում է չլսել միջազգային հանրության մտահոգությունները և էլ ավելի ակտիվացնել Արցախում հումանիտար ճգնաժամ ստեղծելուն ուղղված իր քայլերը։ Հիշեցնենք, որ այսօր արդեն երրորդ օրն է, ինչ ադրբեջանցի սադրիչները Շուշիի հատվածում փակել են Արցախը Հայաստանին կապող Ստեփանակերտ-Գորիս միջանցքը՝ հընթացս ծաղրելով և սադրելով այնտեղ ծառայություն իրականացնող ռուս խաղաղապահներին։
Հետևեք մեզ նաև Telegram-ում
