Դեսպան Սեյրանյանը դասախոսություն է կարդացել Պրահայի Կարլով համալսարանում

Ապրիլի 30-ին Չեխիայում ՀՀ դեսպան Տիգրան Սեյրանյանն այցելել է Պրահայի Կարլով համալսարան՝ Հայաստանի արտաքին քաղաքականության մասին դասախոսություն կարդալու նպատակով: 

Հրավերը կազմակերպել էին համալսարանի հասարակական գիտությունների ֆակուլտետի միջազգային հետազոտությունների ինստիտուտի դասախոս, Հարավային Կովկասի խնդիրների պատասխանատու դոկտոր Սլավոմիր Հորակը՝ Կենտրոնական Եվրոպայի, Բալկանների և Եվրասիայի դիվանագիտական սեմինարի շրջանակներում, հաղորդում են ԱԳՆ մամլո ծառայությունից:

Դեսպան Սեյրանյանը ԲՈՒՀ-ի ուսանողներին եւ պրոֆեսորադասախոսական կազմի երկու տասնյակից ավելի անդամներին և Չեխիայի հայ համայնքի ներկայացուցիչներին հանգամանալից ներկայացրեց հայ-չեխական երկկողմ հարաբերությունների ընթացքը, Հայաստան-ԵՄ հարաբերությունները, ղարաբաղյան հիմնախնդրի կարգավորման վերջի զարգացումները:

Պայմանավորվածություն ձեռք բերվեց դասախոսությունները դարձնել պարբերական:

Հանդիպման ավարտին դեսպանը պատասխանեց ներկաների հարցերին:

Չեխիայում հեղինակությամբ և մեծությամբ առաջինը համարվող Կառլով համալսարանը հիմնադրվել է 1347թ. և ունի շուրջ 50,000 ուսանող: Այն համարվում է Կենտրոնական և Արևելյան Եվրոպայի լավագույն համալսարաններից մեկը:

Հետևեք մեզ նաև Telegram-ում