Բանակցություններ այս պահին համարյա չկան, և դա խնդիրներից մեկն է․ Ռուբեն Վարդանյան

Մենք արդեն օգտագործում ենք վառելիքի ու ապրանքների պահուստային ֆոնդը, բարդագույն իրավիճակ է։

Այս մասին տեսակապով News.am-ի հետ զրույցում հայտարարել է Արցախի Հանրապետության պետական նախարար Ռուբեն Վարդանյանը՝ մեկնաբանելով շրջափակման 24-րդ օրվա դրությամբ Արցախում ստեղծված հումանիտար իրադրությունը։

Պատասխանելով հարցին, թե որքան ժամանակ կբավականացնեն եղած պաշարները՝ Վարդանյանը նշել է․

«Մենք կդիմանանք, ուղղակի մի հարց է ունենալ նման կյանք և ունենալ մրգեր, բանջարեղեն․ էնպես չի, որ մենք սովից մահանալու ենք, բայց պայմանները, որում ապրում են մարդիկ, շատ ծանր են։ Այս ամենը կարող է երկար տևել և մենք դրան պատրաստվում ենք»։

Խոսելով խնդրի կարգավորման շուրջ ընթացող բանակցություններից՝ Ռուբեն Վարդանյանն ասել է․

«Բանակցություններ համարյա չկան, և դա խնդիրներից մեկն է․ ադրբեջանի կողմից ներկայացված պահանջներին մենք պատասխանել ենք և հայտարարել ենք, որ պատրաստ ենք ընդունել համաշխարհային լավագույն էքսպերտներին, ասել ենք, որ դրանում խնդիր չենք տեսնում, սակայն արձագանք չկա նրանց կողմից։ Մենք գտնվում ենք մի իրավիճակում, որ բանակցություններ չեն վարվում»։