Ուկրաինայում հակամարտող կողմերն ունեն 100 հազարական զոհ․ Foreign Affairs

ԱՄՆ հետախուզությունը հրապարակել  է գնահատականներ, համաձայն որոնց՝ ռուս-ուկրաինական պատերազմի ամբողջ ընթացքում կողմերի կորուստները  հաշշվում է 100․000 մարդ յուրաքանչյուր կողմից։ Նշվում է, որ և՛ ուկրաինացիները, և՛ ռուսները անդառնալիորեն կորցրել են տանկային և հետևակային գումարտակների նախնական անձնակազմի մոտ կեսը: Սա և՛ Կիևի, և՛ Մոսկվայի համար մարտական ​​հզորության լուրջ նվազում է։

Ռուս-ուկրաինական պատերազմի մասին այսպիսի ընթացիկ գնահատական է տվել ամերիկյան հեղինակավոր Foreign Affairs պարբերականը՝ նշելով, որ 2022թ-ի հուլիսին բազմաթիվ հիմար ու պարզունակ սխալներ գործելուց հետո ռուսական բանակը սկսել է գործել ավելի պրագմատիկ և խելացի։

«Ռուսաստանի զինված ուժերը, ներգրավելով սակավաթիվ ստորաբաժանումներ, ունենում են անհամաչափ բարձր արդյունավետություն։ Ռուսական բանակը շարքից հանում է ուկրաինական էլեկտրացանցերը՝ դրանով իսկ զրկելով Ուկրաինայի զինված ուժերին ՀՕՊ համակարգեր օգտագործելու, վերահսկելու և հետախուզական տվյալների հավաքագրման հնարավորությունից։

Ռուսական ռազմավարական պլանավորումը վերջապես սկսում է արդյունք տալ. Պահեստազորի մասնակի մոբիլիզացիան, որը հայտարարել էր ՌԴ նախագահ Վլադիմիր Պուտինը սեպտեմբերին, ուժեղացրել է ռուսական ուժերը ռազմաճակատում։ Ուկրաինայի էներգետիկ ենթակառուցվածքի դեմ օդային հրթիռային հարվածների արշավը, որը սկսվել է հոկտեմբերին, ստիպում է Կիևին և նրա դաշնակիցներին ռեսուրսները ուղղել երկրի քաղաքային բնակչության պաշտպանությանը: Իսկ նոյեմբերին Խերսոնից ռուսական զորքերի դուրսբերումը կործանումից փրկեց ռուսական մարտունակ ստորաբաժանումները և ազատեց նրանց այլ վայրերում գործողությունների համար»:

Ըստ պարբերականի՝ հուլիսին ձևավորվել էր տեսակետ, թե ուկրաինական ռազմական հակամարտությունը փակուղի է մտել։ Բայց հաշվի առնելով Խերսոնում Ուկրաինայի հետագա հաջողությունները և Խարկովի շրջակայքի որոշ տարածքների վերագրավումը, այդ գնահատականը սկսեց թվալ վաղաժամ: Այնուամենայնիվ, նշվում է, որ Ուկրաինան այս հաջողություններին հասել է այն ժամանակ, երբ Ռուսաստանի ուժերը սպառված էին, իսկ ռազմական ղեկավարությունը գործում էր խիստ անարդյունավետ:

Ըստ պարբերականի՝ սա մաշեցնող պատերազմ  է, որում հաղթանակը  կողմերից  որևէ մեկին տրվելու է շատ թանկ գնով։ Ուկրաինան և նրա կողմնակիցները, հավանաբար, հույս ունեն, որ Ռուսաստանը խելքի կգա և պարզապես կհրաժարվի ռազմական գործողությունները շարունակելուց, սակայն նման արդյունքը չափազանց անհավանական է թվում:

Նրանք կարող են հույս ունենալ, որ Ռուսաստանի կփլուզվի ռազմաճակատում կամ ներսից, բայց այս սցենարներից որևէ մեկի հավանականությունը նույնպես շատ փոքր է։

«Եթե ​​Կրեմլը կարողանա գործել ողջամիտ ռազմական որոշումների հիման վրա, ապա մեկ տարում արևմտյան հետախուզական ծառայությունները կարող են հաշվել ևս 50․000-ից 100․000 լրացուցիչ  զոհ յուրաքանչյուր կողմից, իսկ արևմտյան օրենսդիրները կարող են քննարկել Ուկրաինային ևս 100 միլիարդ դոլար օգնություն տրամադրելու նախագիծը:  Առայժմ դիվանագիտական ճանապարհով այս սցենարը  փոխելու քիչ հնարավորություն կա, քանի որ երկու կողմերն էլ քաղաքականապես շատ են ներգրավված այս ռազմական հակամարտությունում: Բոլորը կարծում են, որ հաղթանակը հնարավոր է, իսկ պարտությունը՝ աներևակայելի։

Եթե ​​ԱՄՆ-ը միայն ցանկանա, կարող է դիվանագիտական ​​ռազմավարություն մշակել՝ նվազեցնելու մաքսիմալիստական ​​մտածողության մակարդակը թե՛ Ուկրաինայում, թե՛ Ռուսաստանում։ Սակայն մինչ օրս Վաշինգտոնը քայլեր չի ձեռնարկել այդ ուղղությամբ»,-ասվում է հոդվածում։