Մոնիտորինգ. Նախագահի կայքի տեղեկատվական թափանցիկության մակարդակը գնահատվել է 28.91%

Խոսքի ազատության պաշտպանության կոմիտեի նախագահ Աշոտ Մելիքյանն այսօր լրագրողների հետ հանդիպման ժամանակ ներկայացրել է իրենց կոմիտեի կողմից իրականացված «ՀՀ պետական մարմինների տեղեկատվական թափանցիկության խնդիրները` ըստ պաշտոնական կայքերի մոնիտորինգի» տվյալները: Ըստ այդմ՝ Կառավարության առընթեր և այլ պետական մարմիններից տեղեկատվական ամենաթափանցիկության մակարդակով ամենաբարձրը Հայաստանի նախարարությունների մեջ Տարածքային ու կառավարման նախարարությունն է, այնուհետև` տրանսպորտի ու կապի նախարարությունը, տնտեսական մրցակցության պաշտպանության պետական հանձնաժողովը, ԿԳՆ, ԿԲ-ն: 

Բանախոսը նաև ներկայացրել է մոնիտորինգի անցկացման մեթոդաբանությունը, որը մշակել են Սանկտ Պետերբուրգում գործող Տեղեկատվության ազատության զարգացման ինստիտուտը, բայց տեղայնացվել է: 

Մոնիթորինգն անցկացվել է այս տարվա փետրվարի 15-ից ապրիլի 15-ը: Կայքերում գնահատվել են` հանրային նշանակություն ունեցող, հրապարակման ենթակա տեղեկությունների առկայությունը (կամ բացակայությունը), ամբողջականությունը, հրատապությունը, մատչելիությունը` տեխնիկապես: 

Կայքերի դիտարկումն իրականացվել է 177 չափորոշիչով, որոնցից 150-ը բովանդակային են, իսկ 27-ը` տեխնիկական: Ուսումնասիրվել են պետական մարմինների 52 կայք, որոնք պայմանականորեն բաժանվել ենք երեք խմբի. առաջին խմբում ներառված են ՀՀ նախարարությունները, կառավարության առընթեր և այլ պետական մարմիններ` 35 կայք, երկրորդ խմբում ընդգրկված են 10 մարզերի պաշտոնական կայքերը: Մարզերի պաշտոնական կայքերի վարկանշային աղյուսակը գլխավորում է Սյունիքի մարզպետարանի կայքը, այնուհետև` Արմավիրի, Կոտայքի, Արագածոտնի, Շավուշի, Արարատի, Լոռու, Շիրակի, Գեղարքունիքի, Վայոց Ձորի մազպետարանների կայքերը:

Երրորդ խմբում ընդգրկված են ՀՀ նախագահի, ԱԺ-ի, կառավարության, ՍԴ-ի, դատախազության, Երևանի քաղաքապետարանի ու ՄԻՊ պաշտոնական կայքերը: Սրան վերաբերող վարկանշայի աղյուսակ չի կազմվել, քանի որ այդ մարմինների գործառույթները, հետևաբար նաև մոնիտորինգի ընթացքում ստացված տվյալները` համադրելի չեն: 

Նախագահի կայքի տեղեկատվական թափանցիկության մակարդակը գնահատվել է 28.91 տոկոս, ԱԺ-ինը` 45.07 տոկոս, կառավարությանը` 39.92 տոկոս, ՍԴ-ինը` 42.02 տոկոս, դատախազությանը` 55.58 տոկոս, Երևանի քաղաքապետարանինը` 32.89 տոկոս, ՄԻՊ-ինը` 41.42 տոկոս:

Նախարարությունների, կառավարության առընթեր և այլ պետական մարմինների կայքերի մեծամասնությանը բնորոշ թերություններից է` տվյալ ՊՄ-ի ղեկավարի, տեղակալների գործունեությանը վերաբերող հրապարակումների, պաշտոնատար աձնաց որոշումները կամ գործողությունները վիճարկելու մասին տեղեկությունների բացակայությունը:

Երրորդ խմբի կայքերում առավել հարուստ տեղեկություններ են պարունակում այն բաժինները, որոնք վերաբերում են պետական մարմնի մասին ընդհանուր տեղեկատվությանը, բացակայում են հանրային նշանակություն ունեցող այնպիսի տեղեկություններ, ինչպիսիք են` տվյալ մարմնի գործունեության ապահովման համար հատկացված բյուջետային միջոցների ծախսի, ՊՄ-ում իրականացված ստուգումների և դրանց արդյունքների մասին, բացակայում են թափուր պաշտոնների ցանկը և այլն:

Ա. Մելիքյանի խոսքերով՝ նախորդ տարվա համեմատ նկատվել է առաջընթաց, բայց ցանկալի է, որ քայլերն ավելի ակտիվ ու արդյունավետ լինեն: