Տարածաշրջանային և միջազգային կարևոր զարգացումները Times.am-ի դիտակետից։ Ի՞նչ է տեղի ունենում Հարավային Կովկասում և հարակից տարածաշրջաններում։ Կարդացեք միջազգային ամենակարևոր լուրերը մեր ամփոփ տեղեկագրում։
Ինտենսիվ հրթիռակոծություն Ուկրաինայում
Հինգշաբթի գիշերը և առավոտյան Ուկրաինայի տարածքը կրկին ենթարկվել է ռուսական զանգվածային հրթիռային հարձակման։ Ուկրաինայի արտակարգ իրավիճակների պետական ծառայության տվյալներով՝ զոհվել է 11 խաղաղ բնակիչ, ևս 11-ը վիրավորվել է։
Ուկրաինայի զինված ուժերի գլխավոր հրամանատար, գեներալ Վալերի Զալուժնին հայտնել է, որ Ուկրաինայի ուղղությամբ արձակվել է 55 հրթիռ, որոնցից 47-ը խոցվել է Ուկրաինայի հակաօդային պաշտպանության կողմից։
Դնեպրոպետրովսկի և Օդեսայի մարզերում տուժել են էներգետիկ ենթակառուցվածքները։ Կիևի քաղաքացիական ենթակառուցվածքը, որի վրա արձակվել է 20 հրթիռ, գործում է նորմալ (ինչը չի բացառում պլանային անջատումները, որոնցով Ուկրաինան ապրում է աշնան վերջից)։
Պենտագոնը հաստատել է Ուկրաինային տրվող հերթական օգնության ծավալը
Ուկրաինային ԱՄՆ ռազմական օգնության նոր փաթեթի ընդհանուր ծավալը կկազմի 400 միլիոն դոլար։ Ըստ ցուցակի՝ այն կներառի 31 Աբրամս տանկ՝ 120 մմ փամփուշտներով և այլ զինամթերքով, ութ մարտավարական տրանսպորտային միջոց վերականգնման և տարհանման համար, ինչպես նաև ուսուցման, պահպանման և սպասարկման ֆինանսավորում:
Նշվում է, որ Կիևին ԱՄՆ ռազմական օգնության ընդհանուր ծավալը Ջո Բայդենի վարչակազմի աշխատանքի սկզբից ի վեր հասել է 27,8 միլիարդ դոլարի, իսկ 2014 թվականից՝ 29,9 միլիարդ դոլարի։
Սպիտակ տունը նշել է, թե չի սպառնում Ռուսաստանին և սպառնալիք չի ակնկալում
:format(webp)/cloudfront-us-east-1.images.arcpublishing.com/tgam/7W6QWJI6LVIHVFT7BE3I5PU2LA.jpg)
ԱՄՆ-ի նախագահ Ջո Բայդենը հեռախոսազրույց է ունեցել Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Իտալիայի վարչապետ Ջորջ Մելոնիի և Մեծ Բրիտանիայի վարչապետ Ռիշի Սունակի հետ՝ Ուկրաինային օգնություն տրամադրելու վերաբերյալ:
ԱՄՆ նախագահ Ջո Բայդենը Կիևին օգնության հաջորդ փաթեթի հայտարարության ժամանակ նշել է, որ Ուկրաինային օգնելու Արևմուտքի գործողությունները վտանգ չեն ներկայացնում Ռուսաստանի համար։
«Այսօրվա հայտարարությունը հիմնված է ԱՄՆ գլխավորությամբ՝ աշխարհի տարբեր երկրների պատրաստակամության վրա՝ օգնելու Ուկրաինային պաշտպանել իրենց ինքնիշխանությունն ու տարածքային ամբողջականությունը: Դա Ռուսաստանի վրա հարձակման սպառնալիք չէ»,- ասել է Բայդենը:
Իր հերթին Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին հայտարարել է, թե ԱՄՆ-ը սպառնալիք չի տեսնում Ռուսաստանից կողմից։
«Մենք բացարձակապես ոչ մի նշան չենք տեսնում, որ պարոն Պուտինը ծրագրում է հարվածներ հասցնել ՆԱՏՕ-ի տարածքին», – ասել է Քիրբին լրագրողներին:
Զելենսկին ասել է, որ Պուտինն իր համար դարձել է «ոչ ոք». Կրեմլից պատասխանել են
Ուկրաինայի նախագահ Վլադիմիր Զելենսկին բրիտանական Sky News հեռուստաալիքին տված հարցազրույցում հայտարարել է, որ հետաքրքրված չէ Ռուսաստանի նախագահ Վլադիմիր Պուտինի հետ բանակցություններով։
«Դա (բանակցությունները) ինձ հետաքրքիր չէ: Հետաքրքիր չէ հանդիպել նրա հետ, խոսել: Ես իսկապես չեմ հասկանում, թե ով է որոշումներ կայացնում Ռուսաստանում»,- ասել է Զելենսկին
Ուկրաինայի նախագահը հավելել է, որ Ուկրաինա Ռուսաստանի ներխուժումից հետո Պուտինն իր համար դարձել է «ոչ ոք»։
Կրեմլի մամուլի քարտուղար Դմիտրի Պեսկովն արձագանքել է այս հայտարարությանը՝ ասելով․
«Մենք գիտենք, թե ինչ խոստումներով է պարոն Զելենսկին ընտրվել նախագահ… Նա չլուծեց Դոնբասի խնդիրը, չկատարեց Մինսկի պայմանավորվածությունները, չէր էլ պատրաստվում կատարել դրանք։ Նա պատրաստվում էր պատերազմի։ Նա ինքը վաղուց դադարել է լինել նախագահ Պուտինի հավանական ընդդիմախոսը»,- ընդգծել է Կրեմլի խոսնակը։
ԱՄՆ-ի ֆիննախը ռուսական «Վագներ» զինված խմբին ընդգրկել է միջազգային հանցավոր խմբավորումների ցանկում
ԱՄՆ-ի ֆինանսների նախարարությունը ռուսական «Վագներ» մասնավոր զինված խմբին պաշտոնապես ներառել է միջազգային հանցավոր խմբավորումների ցուցակում և կարգադրել սառեցնել նրա բոլոր ամերիկյան ակտիվները։
ԱՄՆ կառավարությունը նաև նշել է մի քանի մարդկանց և կառույցների, որոնք ենթակա են պատժամիջոցների՝ «Վագների» հետ իրենց կապերի համար:
Ամերիկյան իշխանությունները մեղադրում են այս կառույցին ոչ միայն Ուկրաինա ռուսական ներխուժմանը մասնակցելու, այլև աշխարհի այլ երկրներում հանցագործություններ կատարելու մեջ։
Ֆրանսիայի ԱԳՆ-ն հայտարարել է, որ չի պատերազմում Ռուսաստանի դեմ
Ուկրաինայի Զինված ուժերին օրինական ինքնապաշտպանության շրջանակներում զենք մատակարարելու Ֆրանսիայի որոշումը չի նշանակում, որ այդ երկիրը պատերազմի մեջ է Ռուսաստանի դեմ։ Նման հայտարարությամբ է հանդես եկել Ֆրանսիայի ԱԳՆ մամուլի խոսնակ Անն-Կլեր Լեժանդրը։
«Մենք, ինչպես և մեր գործընկերները, պատերազմի մեջ չենք Ռուսաստանի հետ: Ռազմական տեխնիկայի մատակարարումը հակամարտությանը մասնակցություն չէ»,- ասել է նա ճեպազրույցում։
Արարատ Միրզոյանը հանդիպել է Ժոզեպ Բորելին
Աշխատանքային այցով Բրյուսելում գտնվող ՀՀ ԱԳ նախարար Արարատ Միրզոյանը նախօրեին հանդիպում է ունեցել ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Ժոզեպ Բորելի հետ:
Արարատ Միրզոյանը Ժոզեպ Բորելի ուշադրությունն է հրավիրել Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված հումանիտար ճգնաժամին: Շեշտվել է, որ Ադրբեջանը, նոյեմբերի 9-ի եռակողմ հայտարարության դրույթների համաձայն, անհապաղ պետք է դադարեցնի Լաչինի միջանցքի արգելափակումը։ Հայկական կողմը կարևորել է միջազգային հանրության կողմից գործուն քայլերի իրականացումը՝ Լեռնային Ղարաբաղը էթնիկ զտումների ենթարկելու Ադրբեջանի քաղաքականությունը կանխարգելելու համար։
ՀՀ ԱԳ նախարարը և ԵՄ բարձր ներկայացուցիչը քննարկել են Հայաստան-Ադրբեջան հարաբերությունների կարգավորման գործընթացի շուրջ զարգացումները: Անդրադարձ է կատարվել նաև Հայաստան-Թուրքիա հարաբերությունների կարգավորման գործընթացին:
