Պենտագոնի խոսնակ Փաթրիք Ռայդերը հայտարարել է, որ Միացյալ Նահանգների օդային տարածքում չինական հետախուզական օդապարիկ է հայտնաբերվել։ Վերջինս նշել է, որ օդապարիկը գտնվում է «մեծ բարձրւթյան վրա, և մարդկանց համար ռազմական կամ ֆիզիկական վտանգ չի ներկայացնում»:
Միաժամանակ Փաթրիք Ռայդերը նշել է, թե օդապարիկը ոչնչացնելու փորձը կարող է վտանգավոր լինել, հաշվի առնելով դրա մեծ չափը:
Չինական կողմը չի հերքել այն փաստը, որ օդապարիկը հենց չինաստանին է պատկանում։ Սակայն Պեկինից նշում են, որ այն ոչ թե հետախուզական է, այլ օդերևութաբանական։ «Աերոստատը Չինաստանից է հասել Միացյալ Նահանգների օդային տարածք, այն ունի բացառապես քաղաքացիական բնույթ և օգտագործվում է օդերևութաբանական հետազոտությունների համար», – նշված է Չինաստանի արտգործնախարարության տարածած հաղորդագրության մեջ: Ըստ Պեկինի, աերոստատն ուժեր քամուց կորցրել է կառավարելիությունը և շեղվել հաստատված ճանապարհից:
Սակայն չինական կողմի պարզաբանումները չեն բավարարել պաշտոնական Վաշինգտոնին։
ԱՄՆ Պետքարտուղար Էնթոնի Բլինքենն այսօր հայտարարել է, որ օդապարիկի միջադեպի հետ կապված նա չեղարկել է հաջորդ շաբաթ նախատեսած իր այցը Պեկին։ Վաշինգտոնից ստացված հաղորդագրության համաձայն, ամերիկյան կողմը չի ցանկանում մեծ աղմուկ բարձրացնել այդ օդապարիկի պատմությունից: Միաժամանակ, ամերիկացիները չեն ուզում, որ օդապարիկի հարցը հանդիպումների ընթացքում դառնա քննարկումների գլխավոր թեմա:
