ՉԼ․ «Ինտերն» ու «Մանչեսթեր Սիթին» դուրս եկան քառորդ եզրափակիչ

Իտալիայի փոխչեմպիոն Միլանի «Ինտերն» ու Անգլիայի չեմպիոն «Մանչեսթեր Սիթին» դուրս եկան Չեմպիոնների լիգայի քառորդ եզրափակիչ։

Իտալացի Սիմոնե Ինձագիի գլխավորած թիմը 1/8 եզրափակիչի պատասխան խաղում հյուրընկալվեց պորտուգալական «Պորտուին»։ Գրանցվեց ոչ ոքի՝ 0:0։

«Ինտերի» մեկնարկային կազմում էր Հայաստանի հավաքականի նախկին ավագ Հենրիխ Մխիթարյանը, որն անցկացրեց ամբողջ հանդիպումը։ Նա 50-րդ հանդիպումն անցկացրեց գլխավոր եվրագավաթային մրցաշարում։

Si lotta su ogni pallone 💪⚽#ForzaInter #PortoInter #UCL pic.twitter.com/KF6tPx7O3i

— Inter (@Inter) March 14, 2023

«Ինտերը» պայքարը շարունակում է Միլանում տարած 1:0 հաշվով հաղթանակի շնորհիվ։

«Մանչեսթեր Սիթին» 1/8 եզրափակիչի պատասխան խաղում ընդունեց գերմանական «ՌԲ Լայպցիգին»։ Կատալոնացի Խոսեպ Գվարդիոլայի գլխավորած թիմը հաղթեց 7:0 հաշվով։

5 գոլ խփեց նորվեգացի հարձակվող Էրլինգ Հոլանդը, մեկական անգամ էլ աչքի ընկան Գերմանիայի հավաքականի կիսապաշտպան Իլկայ Գյունդոգանը և բելգիացի կիսապաշտպան Կևին Դե Բրույնեն։

Հիշեցնենք, որ քառորդ եզրափակիչ են դուրս եկել նաև Գերմանիայի չեմպիոն Մյունխենի «Բավարիան», Իտալիայի չեմպիոն «Միլանը», անգլիական «Չելսին» ու պորտուգալական «Բենֆիկան»։

Մարտի 15-ին 1/8 եզրափակիչի պատասխան հանդիպումներում Իսպանիայի չեմպիոն Մադրիդի «Ռեալը» կընդունի Անգլիայի փոխչեմպիոն «Լիվերպուլին», Իտալիայի առաջնության առաջատար «Նապոլին»՝ գերմանական «Այնտրախտ Ֆրանկֆուրտին»։

Չեմպիոնների լիգա, 1/8 եզրափակիչ, պատասխան հանդիպում

«Պորտու» – «Ինտեր»՝ 0:0, (առաջին խաղ՝ 0:1)

Հեռացում՝ Պեպե («Պորտու»), 90+7, երկրորդ դեղին քարտ

«Մանչեսթեր Սիթի» – «ՌԲ Լայպցիգ»՝ 7:0, (առաջին խաղ՝ 1:1)

Էրլինգ Հոլանդ, 22, 11մ, 24, 45+2, 54, 57, Իլկայ Գյունդոգան, 49, Կեւին Դե Բրույնե, 90+2