Թուրքիայում այսօր մեկնարկում է նախագահական և խորհրդարանական ընտրությունների նախընտրական քարոզարշավը, այն կտևի մինչև մայիսի 12-ը, իսկ 13-ին կլինի «լռության օր»:
Ընտրությունները կանցկացվեն մայիսի 14-ին, իսկ անհրաժեշտության դեպքում նախագահական ընտրությունների երկրորդ փուլը կարող է անցկացվել մայիսի 28-ին։
«Ընտրական օրացույցն» այս շաբաթ հաստատել է Թուրքիայի բարձրագույն ընտրական խորհուրդը։ ԿԸՀ որոշմամբ՝ նախագահի թեկնածուների առաջադրումը կսկսվի մարտի 19-ին և կավարտվի մարտի 23-ին: Թեկնածուների ցուցակը կհրապարակվի մարտի 31-ին կառավարության տեղեկագրում, որից հետո նրանք կկարողանան սկսել նախընտրական քարոզարշավը:
Թուրքիայի գործող նախագահ Էրդողանը իշխող Ժողովրդական դաշինքի նախագահի թեկնածուն է։ Ընդդիմությունից նրա գլխավոր հակառակորդը կլինի Ժողովրդահանրապետական կուսակցության առաջնորդ Քեմալ Քըլըչդարօղլուն։ Թուրքիայում չեն բացառում, որ նախագահական ընտրությունները կանցկացվեն երկու փուլով։
