Կրեմլի աշխատողները ստիպված կլինեն հրաժարվել iPhone-ներից

ՌԴ նախագահի աշխատակազմի ներքաղաքական բլոկի աշխատակիցներին, որոնք ունեն iPhone հեռախոսներ, խորհուրդ է տրվում մինչև ապրիլի 1-ը դրանք փոխել այլ ապրանքանիշի և այլ օպերացիոն համակարգով սմարթֆոնների։ Այս հանձնարարականը նրանց տրվել է մարտի սկզբին Մոսկվայի մարզում տեղի ունեցած սեմինարի ժամանակ:

Տեղեկությունը հայտնում է ռուսական «Կոմերսանտ» լրատվամիջոցը, որը հղում է անում այդ միջոցառմանը ներկա մի քանի աղբյուրների։

Ըստ «Կոմերսանտ»-ի զրուցակցի՝ հնարավոր է, որ Կրեմլը նոր սմարթֆոններ ձեռք բերի իր աշխատակիցների համար, որպեսզի հեշտացնի նրանց հրաժարումը ամերիկյան տեխնոլոգիաներից։

ՌԴ նախագահի աշխատակազմին մոտ կանգնած աղբյուրը լսել է, որ Apple-ի սարքավորումների օգտագործման արգելքը կտարածվի նաև նահանգապետարաններում ներքին քաղաքականությամբ զբաղվող պաշտոնյաների վրա։ Փորձագետները կարծում են, որ նման միջոցառումները պրագմատիկ են, սակայն կարևոր է հավասարակշռություն հաստատել տեղեկատվական անվտանգության և աշխատակիցների արտադրողականության միջև: