Կիպրոսի Հանրապետության նախագահ Նիկոս Խրիստոդուլիդիսը ակնկալում է առաջընթաց տեսնել Կիպրոսի հարցի կարգավորման հարցում Թուրքիայում մայիսի 14-ին նշանակված համընդհանուր ընտրություններից հետո։ Այդ մասին նախագահն ասել է Euronews-ին տված հարցազրույցում։
«Իհարկե, ես թուրքական արտաքին քաղաքականության մեջ արմատական փոփոխություններ չեմ ակնկալում: Համենայնդեպս, դա է վկայում Թուրքիայի արտաքին քաղաքականության տարիների պատմությունը»:
Խրիստոդուլիդիսը խոստովանել է, որ առջևում շատ դժվարություններ կան, բայց պետք է ամեն ինչ անել, որպեսզի դուրս գան ներկա փակուղուց և փորձեն վերսկսել միջհամայնքային բանակցությունները Կիպրոսի հույների և թուրքերի միջև՝ ՄԱԿ-ի հովանու ներքո։
«Ես շատ մտահոգված եմ, որ մինչ Կիպրոսի հարցը մնում է չլուծված, ամեն օր տեղում նոր զարգացումներ են լինում, որոնք հարցի լուծումը հետ են մղում»,- ասել է նա՝ հավելելով, որ դա իր համար «առաջնահերթություն է»:
Ըստ Կիպրոսի նախագահի՝ բանակցությունները պետք է սկսեն ոչ թե զրոյից, այլ այն կետից, որտեղ 2017-ին դրանք ընդհատվել են շվեյցարական Կրան-Մոնտանա քաղաքում:
