Ֆինլանդիան կանդամակցի ՆԱՏՕ-ին. Շվեդիան դեռևս կսպասի
Նմանատիպ
Երկար բանակցություններից և ճնշումներից հետո Թուրքիայի խորհրդարանը հավանություն է տվել օրինագծին, որը թույլ կտա Ֆինլանդիային միանալ ՆԱՏՕ-ին։
Թուրքիայի խորհրդարանը ՆԱՏՕ-ի դաշինքի 30 անդամներից վերջինն էր, որը վավերացրեց Ֆինլանդիայի անդամակցությունը։ Օրեր առաջ Հունգարիայի օրենսդիր մարմինը ևս հաստատեց Ֆինլանդիայի՝ ՆԱՏՕ-ին անդամակցելու օրինագիծը:
Ֆինլանդիան և Շվեդիան ՆԱՏՕ-ին անդամակցելու խնդրանքով դիմել էին անցյալ տարի, երբ սկսվեց ռուս-ուկրաինական հակամարտությունը: Սակայն վերջիններիս անդամակցության գործընթացը կասեցվել էր Թուրքիայի և Հունգարիայի կողմից. որևէ նոր երկրի անդամակցության համար անհրաժեշտ է ՆԱՏՕ-ի բոլոր անդամների խորհրդարանների վավերացումը։ Այժմ Ֆինլանդիայի «խնդիրը լուծվեց», իսկ Շվեդիան դեռ պետք է սպասի՝ նույն Թուրքիայի և Հունգարիայի խորհրդարանների վավերացմանը։
«ՆԱՏՕ-ին անդամակցությունը կամրապնդի Ֆինլանդիայի անվտանգությունը և կբարելավի կայունությունը Բալթիկ ծովում և Հյուսիսային Եվրոպայում»,- հայտարարել է Ֆինլանդիայի կառավարությունը՝ հավելումով, որ երկիրը կշարունակի կանգնել Շվեդիայի կողքին և կաջակցի ՆԱՏՕ-ին անդամակցելու գործընթացում։
Ֆինլանդիայից առաջ վերջին երկիրը, որը միացել էր ՆԱՏՕ-ին, Հյուսիսային Մակեդոնիան էր, որը դաշինքին միացել էր 2020 թվականին։
Հետևեք մեզ նաև Telegram-ում