Ուկրաինան Լեհաստանից կգնի 100 զրահափոխադրիչ

Ուկրաինան Լեհաստանից գնում է լեհական արտադրության «Ռոսոմակ» 100 զրահափոխադրիչ։ Այդ մասին շաբաթ օրը հայտարարել է Լեհաստանի վարչապետ Մատեուշ Մորավիեցկին՝ ելույթ ունենալով գործարանում, որտեղ արտադրվում են այդ զրահափոխադրիչները։

«Երեկ Ուկրաինայի վարչապետ Դենիս Շմիգալից պատվեր եմ ստացել այստեղ արտադրվող 100 «Ռոսոմակ»-ի համար»,- ասել է նա։ Մորավիեցկիի խոսքով՝ զրահատեխնիկայի դիմաց Ուկրաինան կվճարի հատկացված եվրոպական և ամերիկյան միջոցներից»։

Ինչպես նշել է Լեհաստանի վարչապետը, Լեհաստանի պաշտպանական արդյունաբերության զարգացումը «թափ է հավաքում»։ Առաջիկայում սպասվում են նոր պատվերներ, մասնավորապես Սաուդյան Արաբիայից ու Սլովենիայից։

Լեհաստանը կարող է տարեկան արտադրել 100 «Ռոսոմակ»: Մորավիեցկիի խոսքով, հանրապետությունը կփորձի ավելացնել այս թիվը։