Ճապոնիայի ԱԳ նախարարը կայցելի Երևան
Նմանատիպ
Հունիսի 6-ին Տոկիոյում՝ ՀՀ Նախագահի գլխավորած պատվիրակության կազմում գտնվող ԱԳ նախարար Էդվարդ Նալբանդյանը հանդիպում ունեցավ Ճապոնիայի ԱԳ նախարար Կոիչիրո Գեմբայի հետ:
Արտգործնախարարները բարձր գնահատեցին երկու երկրների միջև հաստատված երկխոսությունը և խորհրդանշական համարեցին, որ ՀՀ Նախագահ Սերժ Սարգսյանի այցելությունը Ճապոնիա տեղի է ունենում դիվանագիտական հարաբերությունների հաստատման քսանամյակի հոբելյանական տարում, հայտնում են ՀՀ ԱԳՆ տեղեկատվության և հասարակայնության հետ կապերի վարչությունից:
Նախարարներ Նալբանդյանն ու Գեմբան հանգամանալից զրույց ունեցան երկկողմ հարաբերությունների առավել զարգացման և այդ ուղղությամբ ձեռնարկվելիք քայլերի շուրջ:
Հայաստանի և Ճապոնիայի արտաքին քաղաքական գերատեսչությունների ղեկավարները կարևորեցին հանդիպումից առաջ ԱԳՆ-երի միջև ստորագրված համագործակցության մասին հուշագիրը՝ համոզմունք հայտնելով, որ այն կնպաստի իրենց ղեկավարած նախարարությունների փոխգործակցության սերտացմանը, քաղաքական խորհրդակցությունների ակտիվացմանը:
Բանակցությունների օրակարգում էին Կորեական թերակղզու և Հարավային Կովկասի խնդիրները, դրանց լուծման համար գործադրվող ջանքերը:
Հանդիպմանը անդրադարձ եղավ նաև միջազգային կազմակերպություններում հայ-ճապոնական փոխգործակցությանը, միմյանց թեկնածությունների աջակցությանն առնչվող հարցերին:
Հայաստանի ԱԳ նախարարը իր ճապոնացի գործընկերոջը հրավիրեց այցելել Երևան:
Հետևեք մեզ նաև Telegram-ում