Apple-ը կգործարկի առողջությանն ու սննդակարգին հետևող նոր ծառայություն․ Bloomberg

Ամերիկյան Apple տեխնոլոգիական ընկերությունը մտադիր է գործարկել վճարովի ծառայություն, որը թույլ կտա վերահսկել սնվելու գործընթացն ու առողջական վիճակը։

Այս մասին գրում է Bloomberg գործակալությունը։

Նախագիծը գործում է Quartz ծածկանունով: Աղբյուրների համաձայն՝ արհեստական բանականության հիման վրա գործող ծառայությունը կօգնի կազմակերպել մարզումների ծրագիր, խորհուրդներ կտա ճիշտ սնվելու և քնի ռեժիմի վերաբերյալ։

Հավելվածը կունենա բժշկական գործառույթներ և մատյան, որը օգտատերը կարող է վարել։

Առողջ ապրելակերպի վերաբերյալ առաջարկություններն ընտրվելու են արհեստական բանականության կողմից։ Ամենայն հավանականությամբ, Quartz-ը կգործի վճարովի բաժանորդագրությամբ։

Սպասվում է, որ Apple-ը հավելվածը կներկայացնի 2024 թվականին: Ծառայությունը հասանելի կլինի iPhone-ի, iPad-ի և Apple-ի ֆիրմային մյուս սարքավորումներն օգտագործողների համար։