Թուրքիայում մեկնարկել են համապետական ընտրությունները

Թուրքիայում մայիսի 14-ին մեկնարկել են համապետական՝ նախագահական և 28-րդ գումարման խորհրդարանական ընտրությունները, հայտնում է «Անադոլու» գործակալությունը։

Ընտրատեղամասերը բացվել են առավոտյան ժամը 8:00-ին և կփակվեն տեղական ժամանակով 17:00-ին: Ընդհանուր առմամբ հանրապետությունում տեղադրվել է 191 885 քվեատուփ։

Թուրքիայում և նրա սահմաններից դուրս քվեարկելու է ավելի քան 64,1 միլիոն ընտրող։ Մոտ 4,9 միլիոն մարդ առաջին անգամ կքվեարկի։

Ընտրողներին կտրվի 2 քվեաթերթիկ՝ նախագահի և պատգամավորների համար։ Ընտրողները երկու առանձին քվեաթերթիկներ կտեղադրեն մեկ ծրարի մեջ և կգցեն քվեատուփի մեջ։

Թուրքիայի նախագահական ընտրություններին երեք թեկնածու է մասնակցում՝ երկրի գործող ղեկավար Ռեջեփ Թայիփ Էրդողանը, ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուն և «ATA դաշինք» դաշինքի թեկնածու Սինան Օղանը։

Ընտրություններին մասնակցելու համար գրանցված է 24 քաղաքական կուսակցություն և 151 անկախ թեկնածու։

Եթե թեկնածուներից ոչ մեկն առաջին փուլում չհավաքի ձայների կեսից ավելին, երկրորդ փուլը կկայանա մայիսի 28-ին։