Հունգարիան համաձայն է Ֆրանսիայի հետ, որ Եվրոպային անհրաժեշտ է ռազմավարական ինքնավարություն, որը թույլ կտա պաշտպանել իր շահերը։ Այս մասին հայտարարել է Հունգարիայի նախագահ Կատալին Նովակն՝ իր ֆրանսիացի գործընկեր Էմանուել Մակրոնի հետ հանդիպումից հետո:
Նա նշել է, որ մինչ ԵԽ համաժողովի մեկնարկը խորհրդակցություններ է անցկացրել Ֆրանսիայի նախագահի հետ։ «Եվրոպան ռազմավարական ինքնավարության կարիք ունի, որպեսզի կարողանա որոշումներ կայացնել՝ իր շահերից ելնելով: Մեզ անհրաժեշտ է խաղաղություն Ուկրաինայում որքան հնարավոր է շուտ», – գրել է Նովակը Facebook-ի իր էջում:
Հունգարիայի նախագահը հավելել է, որ մտադիր է Ուկրաինայում խաղաղության անհրաժեշտության մասին խոսել ոչ միայն Եվրախորհրդի գագաթնաժողովում, այլ նաև այլ միջազգային ֆորումներում, այդ թվում՝ վաղը Նյու Յորքում ՄԱԿ-ի ամբիոնից։
Հիշեցնենք՝ Մակրոնը վերջերս բազմիցս հայտարարել է Եվրամիության ռազմավարական ինքնավարության անհրաժեշտության մասին՝ նկատի ունենալով, մասնավորապես, քաղաքական անկախությունը, տնտեսական մրցունակությունը և բավարար պաշտպանական ներուժը՝ առանց ԱՄՆ-ի վրա հենվելու սեփական անվտանգությունն ապահովելու համար։
