Հիվանդության պատճառով Սելին Դիոնը չեղարկել է 2024 թվականի համերգները

Կանադացի աշխարհահռչակ երգչուհի Սելին Դիոնը հայտնել է 2024 թվականի իր համաշխարհային շրջագայությունը չեղարկելու մասին։

Երգչուհուն մոտ կանգնած աղբյուրը CNN-ին հայտնել է, որ «հավանական է՝  նա այլևս երբեք շրջագայություն չիրականացնի»։

«Նա մեծ ցավերի մեջ է։ Ամեն օր ֆիզիկական թերապիաներ է անցնում»,- հայտնել է աղբյուրը։

Երգչուհին շրջագայությունը չեղարկելու մասին հայտնել է սոցիալական մեդիայի իր էջերում։ «Ցավում եմ բոլորիդ հերթական անգամ հիասթափեցնելու համար։ Ես իսկապես մեծ աշխատանք եմ իրականացնում՝ վերադարձնելու իմ ուժերը, սակայն շրջագայելը չափազանց բարդ է, անգամ 100 տոկոսանոց առողջություն ունենալու դեպքում։ Ձեր հանդեպ արդար չի լինի անընդհատը հետաձգելու շոուները, և թեպետ իմ սիրտը շատ է ցավում, սակայն լավագույն տարբերակն է այս պահի դրությամբ չեղարկել ամեն բան, մինչև ես պատրաստ կլինեմ նորից բեմ բարձրանալ։ Ուզում եմ բոլորդ իմանաք, որ ես չեմ հանձնվում․․․ Եվ ես անհամբեր եմ, թե երբ նորից կտեսնեմ բոլորիդ»,- գրել էր երգչուհին։

Սելին Դիոնը մի քանի շոու արդեն հետաձգել էր 2022 թվականի դեկտեմբերին՝ այն բանից հետո, ինչ նրա մոտ ախտորոշվել էր հազվադեպ հանդիպող նյարդաբանական հիվանդություն՝ մկանային ձգվածության համախտանիշ։ Արագ զարգացող այս հիվանդությունն ազդում է մարդու նյարդային համակարգի, մասնավորապես գլխուղեղի ու ողնաշարի վրա։

Սելին Դիոնի համերգների վաճառված բոլոր տոմսերի գումարները կվերադարձվեն։

Սելին Դիոնն իր կարիերան սկսել է վաղ տարիքից և արդեն 1980-ականների վերջերից սկսել է հանդես հալ ամենատարբեր միջազգային մրցույթներում։ 1988թ-ին Եվրատեսիլում նա ներկայացրել է Շվեյցարիան ու հաղթել Ne Partez Pas Sans Moi երգով։

1994թ-ին Սելին Դիոնն ամուսնացավ կանադացի հայտնի պրոդյուսեր Ռենե Անժելիլի հետ, ով նրանից մեծ էր 20 տարով և հետագայում դարձավ երգչուհու փայլուն կարիերայի ճարտարապետը։

Սելին Դիոն և Ռենե Անժելիլ․ Ռենեն մահացավ 2016թ-ին քաղցկեղի հետևանքով

Սելին Դիոնն իր կարիերայի ընթացում հեղինակել է տասնյակ համաշխարհային հիթեր, նրա ձայնասկավառակները վաճառվել են ավելի քան 200 միլիոն օրինակ:

Դիոնն արժանացել է ավելի քան 1000 մրցանակների, որոնց թվում՝ 5 գրեմմի, 2 օսկար, ոսկե գլոբուս և հեղինակավոր այլ մրցանակներ։