Փոխոստիկանապեստ. «Հիասթափված եմ և՛ լրագրողների, և՛ հեղինակազրկված շարժումների կողմից Վ. Ավետյանի մահը արդեն ամբողջությամբ շահարկող ամբոխից»

«Ժառանգություն» կուսակցության անդամ, Վահե Ավետյանի հիշատակին նվիրված մոմառվառության ակտիվ մասնակից Դավիթ Սանասարյանը երեկ «Հարսնաքար» ռեստորանային համալիրի մոտ տեղի ունեցած դեպքերի հետ կապված Ոստիկանության Երեւանի վարչության պետի տեղակալ Ռոբերտ Մելքոնյանի «Ֆեյբուքյան» էջում գրել է.

«Պարոն Մելքոնյան, ես էլ մտածում էի, թե փոխվել են մեր ոստիկանները, բոլորին ասում էի, թե վատը, բացասականն անցյալում են, մեր ոստիկանները արդիականանում են, էսօր պարզ դարձավ, որ կարմիր բերետավորներն իրանց կաշին չեն փոխել: Էդ մարդիկ անջատված են, չեն զգում ոչ մի բան: Որպես ՀՀ քաղաքացի խնդրում եւ պահանջում եմ փոխեք դրանց, ընտրեք նորմալ հոգեւիճակ ունեցող կիրթ մարդկանց: Հուսով եմ ականջալուր կլինեք»:

Նրան Երեւանի փոխոստիկանապետը պատասխանել է. «Իմ շատ հարգելի պարոն Սանասարյան, ես մտածում էի, որ քաղաքական-հասարակական գործիչները իմ հորդորներից հետո ողջամիտ կգտնվեն եւ չեն խախտի մոմավառության խորհուրդը, այն կանցկացնեն աստվածահաճո: Հիասթափված եմ եւ՛ նրանց, եւ՛ լրագրողների, եւ՛ հեղինակազրկված շարժումների կողմից Վ. Ավետյանի մահը արդեն ամբողջությամբ շահարկող ամբոխից, որոնք անջատված, անզգա փակեցին մայրուղին՝ խախտելով բարոյականության բոլոր սահմանները: Ես հետագայում ավելի մանրակրկիտ եւ խորությամբ կանդրադառնամ… Ես Ձեզ շատ եմ հարգում, ցավում եմ, որ Դուք այդ «քամուց քշվածների» հետ եք եւ մասնակցեցիք խզմալյանական անհաջող բեմադրությանը… Ի տարբերություն Ձեզ, Ժ. Սեֆիլյանը ինչպես միշտ ստոիկյան կեցվածքով կողքից նայում էր այդ ամենին: Հա՛, Աստվածասեր «Բազազի» պատասխանն էին ուզում լսել որոշ օգտատերեր: Համենայնդեպս ես նորից Ձեզ սթափության կոչեր արեցի, Աստված էլ շուրջ մեկ ժամ սթափեցնող անձրեւ տեղաց, որպեսզի որոշ տաքագլուխներ սթավեն, սակայն նրանք չհասկացան, շարունակեցին իրենց ամբոխավարությունը… Իսկ անջատված բերետավորներից կազատվենք, Մոսկվան միանգամից չի կառուցվել: Չնայած ամեն ինչ փոխադարձ է, նրանք էլ կարող են թերանալ, ռոբոտ չեն»: