Գոռ Սուջյանն ու Միքայել Ոսկանյանը չեղարկել են մեծ համերգը` ի աջակցություն Արցախի

Գոռ Սուջյանի ու «Միքայել Ոսկանյան և ընկերներ» բենդի մեծ համերգը չեղարկվել է ի աջակցություն Արցախի։ Այս մասին հայտնում է Sputnik Արմենիան։

Գոռ Սուջյանն ասել է, որ «AFTERPARTY» խորագրով համերգը պետք է կայանար հուլիսի 30-ին կանանց և նորարարության «FemInno» կոնֆերանսի շրջանակում։

«Կազմակերպիչների հետ որոշում կայացվեց չեղարկել համերգը, բայց ավելի փոքր ելույթները չենք չեղարկի, որովհետև կարծում ենք, որ ակցիաներին զուգահեռ պետք է տարածվի նաև հայկական մշակույթը»,- նշել է երաժիշտը։

Ոսկանյանը տեղեկացրել է, որ ինքն էլ կմիանա ակցիաներին, քանի որ միշտ սատարում է Արցախին ու արցախցիներին։

Հիշեցնենք՝ տևական ժամանակ է` Երևանում ակցիաներ են իրականացվում ի աջակցություն Արցախի։ Այսօր «Մենք Արցախն ենք» նախաձեռնության անդամները, միանալով համաժողովրդական շարժմանը, կարճ ժամանակով փակեցին Երևանի մի քանի փողոցները` Հայաստանի քաղաքացիներին, երևանցիներին իրազեկելու, թե ինչ վիճակում են Արցախի մեր հայրենակիցները: