Պետությանը պատճառվել է 10 մլն դրամի վնաս. Դատախազությունը` «Հայֆիլմի» վաճառքի մասին

«Համո Բեկնազարյանի անվան «Հայֆիլմ» կինոստուդիայի» վաճառքի արդյունքում պետությանը պատճառել է 10 մլն դոլարի վնաս։ Տեղեկությունը հայտնել է ՀՀ դատախազությունը։

Նշվում է, որ կառավարության 2005 թվականի ապրիլի 21-ի որոշմամբ՝ մշակույթի նախարարության ենթակայությամբ գործող «Համո Բեկնազարյանի անվան «Հայֆիլմ» կինոստուդիա» ՊՈԱԿ-ին ամրացված գույքը մրցույթով օտարվել է «Արմենիա Ստուդիոս» ՓԲԸ-ին` 350 մլն դրամով:

Կատարված ուսումնասիրության արդյունքում պարզվել է, որ ՀՀ-ի և «Արմենիա Ստուդիոս» ՓԲԸ-ի միջև 2005 թվականի սեպտեմբերի 14-ին կնքված պայմանագրով՝ ՓԲ ընկերությանն են օտարվել Երևան քաղաքի Չաուշի 50 հասցեում գտնվող 24 հազար 292.6 քմ մակերեսով շենք-շինությունները և կինոբեմադրական միջոցները:

«Արմենիա Ստուդիոս» ՓԲԸ-ն 2008 թվականի հոկտեմբերի 10-ին վերանվանվել է «Համո Բեկնազարյանի անվան «Հայֆիլմ» կինոստուդիա» ՓԲԸ-ի:

«Պայմանագրով նախատեսվել է 30 մլրդ դրամի ներդրում, որից առնվազն 10 մլրդ դրամը պարտավորվել է իրականացնել «Համո Բեկնազարյանի անվան «Հայֆիլմ» կինոստուդիա» ՓԲԸ-ն՝ 10 տարվա ընթացքում։ Պարտավորությունների կատարման վերջնաժամկետ է սահմանվել 2014 թվականի դեկտեմբերի 31-ը, իսկ հաշվետվության ներկայացման վերջնաժամկետ՝ 2015 թվականի մարտի 31-ը։ Պայմանագրով սահմանվել է նաև, որ ներդրողը ներդրումային ժամանակահատվածի ընթացքում պետք է ունենա 10 մլն դոլարի չափով երաշխիքային նամակ «Նորթերն Թրաստ» ընկերությունից»,- ասված է հաղորդագրությունում։

2006-2009 թվականների ընթացքում «Համո Բեկնազարյանի անվան «Հայֆիլմ» կինոստուդիա» ՓԲԸ-ի կողմից կատարվել է 748 մլն դրամի ներդրում, իսկ 2010-2011 թվականների համար ներկայացվել է հաշվետվություն, որը չի ունեցել պատշաճ հիմնավորումներ: Պետական գույքի կառավարման կոմիտեն բազմաթիվ գրություններով դիմել է ներդրողին լրացուցիչ փաստաթղթեր ներկայացնելու համար, որը չի կատարվել:

Այսպիսով, շուրջ 10 տարվա ընթացքում պետությանը պատճառվել է 10 մլն դոլարի վնաս:

Նշվում է, որ արդյունքում կառավարության 2015 թվականի օգոստոսի 31-ին լուծվել է կնքված պայմանագիրը, պայմանագրով սահմանված գույքի արժեքը՝ 350 մլն դրամը պետության կողմից վերադարձվել է գնորդին, իսկ «Համո Բեկնազարյանի անվան «Հայֆիլմ» կինոստուդիա» ՓԲԸ-ի 100 տոկոս բաժնետոմսերը գրանցվել են որպես ՀՀ սեփականություն։

Ուսումնասիրությամբ պարզվել է նաև, որ 2005-2016 թվականներին անհայտ անձանց կողմից հափշտակվել են «Համո Բեկնազարյանի անվան «Հայֆիլմ» կինոստուդիա» ՓԲԸ-ի հաշվեկշռում գտնվող պատմամշակութային արժեք հանդիսացող 2 մլն 658 հազար 220 դրամ նախնական արժեքով բեմական իրեր և տեխնիկական միջոցներ:

Քննչական կոմիտեում նախաձեռնվել է քրեական վարույթ՝ պաշտոնեական անփութություն, պատմական, գեղարվեստական կամ մշակութային առանձնակի արժեք ունեցող առարկաների հափշտակություն և պետական կամ համայնքային սեփականություն հանդիսացող հողամասերի ինքնակամ զավթում հոդվածներով: