Արևմուտքը փնտրում է «ուղիներ» հացահատիկի գործարքի վերսկսման համար

The Wall Street Journal-ը, վկայակոչելով ԱՄՆ պաշտոնյաներին, գրել է, որ ԱՄՆ-ը բանակցություններ է վարում Թուրքիայի, Ուկրաինայի և նրանց հարևանների հետ՝ առանց Ռուսաստանի մասնակցության ուկրաինական հացահատիկի արտահանման այլընտրանքային ուղիներ ստեղծելու համար։ Աշխատանքները տարվում են Թուրքիայի և ՄԱԿ-ի՝ Ռուսաստանին սևծովյան նախաձեռնության իրականացմանը վերադարձնելու փորձերին զուգահեռ։

The Wall Street Journal -ի տվյալներով՝ հավաքական արևմուտքը Թուրքիայի նախագահ Ռեջեփ Թայիփ Էրդողանի վրա ճնշում է գործադրում, որպեսզի  վերջինս Մոսկվային ստիպի վերսկսել հացահատիկի գործարքը մինչև սեպտեմբերի սկիզբը, երբ հավաքված հացահատիկը կսկսի կուտակվել։

Ըստ WSJ-ի աղբյուրների՝ ծրագրերի իրականացումը մասամբ հիմնվելու է ԵՄ նախաձեռնության վրա՝ ստեղծել «համերաշխության ուղիներ»:

Անցած մայիսից այս ճանապարհների միջոցով արտահանվել է 41 մլն տոննա հացահատիկ, ինչը զգալիորեն ավելին է, քան արտահանվել է Սև ծովի նախաձեռնությամբ (ՄԱԿ-ի տվյալներով՝ 32,9 մլն տոննա գյուղմթերք)։

Հրատարակության տվյալներով՝ մշակվող պլանի համաձայն՝ մինչև հոկտեմբեր հնարավոր կլինի ամեն ամիս չորս միլիոն տոննա հացահատիկ ուղարկել Դանուբի երկայնքով։ Դրա մեծ մասը կիջնի գետով և Սև ծովի վրայով Ռումինիայի մոտակա նավահանգիստներ, որտեղից կտեղափոխվի այլ երկրներ։

Հացահատիկի արտահանման այս մեթոդը թեև ավելի թանկ է և ավելի երկար, քան բեռնափոխադրման միջանցքը, որն օգտագործվում է որպես «հացահատիկի գործարքի» մաս, սակայն այն կարող է դառնալ դրա այլընտրանքը, ընդգծում է WSJ-ն։

Միաժամանակ, ըստ թերթի աղբյուրներից մեկի, Վաշինգտոնը դիտարկում է այլ տարբերակներ, այդ թվում՝ ռազմական լուծումներ՝ պաշտպանելու ուկրաինական նավահանգիստներով անցնող նավերը։