Պենտագոնը Ուկրաինային ներկայացրել է պահանջներ F-16-երի փոխանցման համար

Որպեսզի ԱՄՆ-ը համաձայնի F-16 կործանիչ-ռմբակոծիչների տեղափոխմանը, Կիևը պետք է կատարի մի քանի պայմաններ։ Այս մասին հայտնել է Պենտագոնի մամուլի քարտուղարի տեղակալ Սաբրինա Սինգհը։

«Որպեսզի ավարտվի փոխանցումը, պետք է կատարվեն որոշակի պայմաններ, ներառյալ անգլերենի ուսուցումը և այլ բաներ, օրինակ՝ նյութատեխնիկական ապահովումը և այլն»,- հայտարարել է ԱՄՆ ռազմական գերատեսչության ներկայացուցիչը։ «Այնպես որ, եթե այդ պայմանները կատարվեն, մենք կարող ենք թույլ տալ փոխանցումը», – հավելել է նա՝ նկատի ունենալով Դանիայից և Նիդեռլանդներից Ուկրաինա ուղարկվող F-16 ինքնաթիռները։

Ներկայացուցիչն ասել է, որ ուկրաինացի օդաչուներին անհրաժեշտ է «անգլերենի լուրջ վերապատրաստում» F-16-ով թռչելու համար: Ուկրաինական կողմը կորոշի ուսուցման համար օդաչուների ընդհանուր թիվը, հայտնել է Պենտագոնի մամուլի քարտուղարի տեղակալը։ Նրա խոսքով՝ Կիևը «դեռ որոշում է, թե քանի օդաչուի կարող է պատրաստել»։

Նա նշել է, որ ԱՄՆ-ը «բաց է պատրաստելու» ուկրաինացի օդաչուներին իր տարածքում, «եթե Եվրոպայում սպառվեն հնարավորությունները»։

«Սրանք են պայմանները: Այսպիսով, Դանիան և Նիդեռլանդները առաջատար դիրք են զբաղեցնում պատրաստման հարցում, սակայն, եթե նրանք պարզապես չունենան հնարավորություններ պատրաստել այնքան օդաչու, որքան ցանկանում է Ուկրաինան կամ նախատեսում է ուղարկել, ապա մենք կարող ենք օգնել վերապատրաստումների հարցում»,- նշում է Պենտագոնի մամուլի ծառայությունը։

Հավելենք, որ Դանիան և Նիդեռլանդներն արդեն հայտարարել են ուկրաինացի օդաչուների պատրաստման մասին՝ ինը այլ երկրների օգնությամբ։ Հուլիսին Դանիայի պաշտպանության նախարարի ժամանակավոր պաշտոնակատար Տրոելս Լունդ Պոուլսենը հայտարարել էր, որ մարզումները կսկսվեն օգոստոսին հարավային Յուտլանդիայի Սկրիդստրուպ քաղաքում: Ծրագրերի համաձայն՝ դրա համար կպահանջվի առնվազն վեց ամիս։