Էրդողանը խոսել է Թուրքիայի և Սիրիայի հարաբերությունների կարգավորման մասին

Թուրքիայի նախագահ Ռեջեփ Թայիփ Էրդողանը հայտարարել է, որ Սիրիայի նախագահ Բաշար ալ-Ասադը «դիտորդական դիրքորոշում» է ցուցաբերում Անկարայի և Դամասկոսի միջև հարաբերությունների կարգավորման գործընթացում, սիրիական կողմից դրական վերաբերմունք չկա։

2011 թվականին Սիրիայում քաղաքացիական պատերազմ սկսվեց։ Թուրքիան, որը մինչ այս հակամարտությունը սերտ հարաբերություններ էր պահպանում Դամասկոսի հետ, սատարեց Ասադի հակառակորդներին։ Այդ ժամանակից ի վեր Թուրքիայի հարաբերությունները Սիրիայի հետ բարդացան։ Վերջին շրջանում, սակայն, երկու կողմերը, ինչպես նաև երկու երկրների հարաբերությունները լուսաբանող լրատվամիջոցները սկսել են խոսել աստիճանական կարգավորման հնարավորության մասին։ Անցյալ տարվա դեկտեմբերին Ռուսաստանը հյուրընկալեց Թուրքիայի և Սիրիայի պաշտպանության նախարարների վերջին 11 տարվա ընթացքում առաջին բանակցությունները։ Ասադն ասել է, որ Սիրիայից թուրքական զորքերի դուրսբերումն անհրաժեշտ պայման է Դամասկոսի և Անկարայի միջև հարաբերությունների կարգավորման համար։

«Նախ ասեմ, որ Ասադը, ցավոք, հեռվից, ամբիոնից է հետևում Թուրքիա-Ռուսաստան-Իրան-Սիրիա ձևաչափով իրավիճակի կարգավորմանն ուղղված քայլերին, այլ կերպ ասած՝ չի մասնակցում։ Մենք բացեցինք դռները այս ջանքերի համար՝ հուսալով, որ Սիրիան կմասնակցի այս աշխատանքին, և նրանց տեղը բանակցային սեղանի շուրջ է»,- ասել է Էրդողանը։

Նրա խոսքով, «քառյակի» (Թուրքիա, Ռուսաստան, Իրան և Սիրիա) ԱԳ նախարարները համակողմանիորեն քննարկում են ահաբեկչության դեմ պայքարի, քաղաքական գործընթացի և փախստականների անվտանգ ու արժանապատիվ վերադարձի հարցերը։

«Եթե այս թեմաներում առաջընթաց գրանցվի, ապա հնարավոր է նաև հարաբերությունների կարգավորում»,- հավելել է Թուրքիայի ղեկավարը՝ նշելով, որ գործընթացը պետք է առաջ ընթանա «առանց նախապայմանների», և կարևոր է, որ սիրիական կողմը «գործի տեղում իրողություններին համապատասխան և խուսափի մոտեցումներից, որոնք կարող են վնասել գործընթացին»։

Էրդողանը հավելել է, որ Սիրիայի հետ հարաբերությունների կարգավորման գործընթացից Անկարայի հիմնական ակնկալիքներն ահաբեկչության դեմ պայքարում կոնկրետ քայլեր են։

Նախագահը նշել է, որ «Թուրքիան հանդես է գալիս իր հարևանների տարածքային ամբողջականության օգտին»։ «Սիրիայում քաղաքացիական պատերազմի հենց սկզբից մենք հայտարարել ենք, որ մեր երկրի տարածքային ամբողջականության ամենամեծ վտանգը Սիրիայում տեղակայված ահաբեկչական կազմակերպություններն են: Մեր պայքարը ահաբեկչական կազմակերպությունների դեմ, որոնք սպառնում են մեր երկրին, կշարունակվի այնքան ժամանակ, մինչև չեզոքացվի վերջին ահաբեկիչը: Մենք այս տարածաշրջանում ենք, որպեսզի մաքրենք Սիրիայի հյուսիսը ահաբեկչական կազմակերպություններից, որոնք սպառնում են Թուրքիային»,- եզրափակել է Էրդողանը։