ԵՄ-ն կօգտվի G20-ում ՌԴ և Չինաստանի ղեկավարների բացակայությունից
Նմանատիպ
Եվրամիությունը նախատեսում է օգտվել Ռուսաստանի նախագահ Վլադիմիր Պուտինի և Չինաստանի ղեկավար Սի Ցզինպինի բացակայությունից Հնդկաստանում կայանալիք G20 գագաթնաժողովում, որպեսզի կապ հաստատի գլոբալ հարավի երկրների հետ միջոցառման շրջանակում աֆրիկյան առաջնորդների հետ հանդիպումների ժամանակ։ Այս մասին հայտնում է Bloomberg-ը վկայակոչելով գագաթնաժողովի նախապատրաստական աշխատանքներին ծանոթ աղբյուրներին:
«Քանի որ Չինաստանի և Ռուսաստանի առաջնորդները չեն մասնակցում Նյու Դելիում երկօրյա հանդիպմանը, ԵՄ-ն ցանկանում է օգտագործել պահը»,- ասել են աղբյուրները։ ԵՄ-ն ցանկանում է ցույց տալ, որ լրջորեն է վերաբերվում Աֆրիկայի հետ իր գործընկերությանը, չնայած գաղութատիրության ծանր ժառանգությանը:
Ըստ աղբյուրների՝ հանդիպումներին պետք է մասնակցեն Եվրահանձնաժողովի ղեկավար Ուրսուլա ֆոն դեր Լեյենը, Եվրոպական խորհրդի ղեկավար Շառլ Միշելը և Գերմանիայի կանցլեր Օլաֆ Շոլցը։ Աֆրիկյան կողմից մասնակիցները կլինեն Հարավային Աֆրիկայի, ինչպես նաև Եգիպտոսի, Նիգերիայի և Աֆրիկյան միության ներկայիս նախագահող Կոմորյան կղզիների ներկայացուցիչներ:
Հանդիպումների օրակարգի թեմաները, ի թիվս այլ հարցերի, կներառեն հացահատիկի գործարքի կասեցման հնարավոր ազդեցությունը, համաշխարհային ֆինանսական ճարտարապետությունը բարեփոխելու ջանքերը, Աֆրիկայում մասնավոր ներդրումների և ենթակառուցվածքային նախագծերի պայմանների բարելավումը և իրավիճակը Սահելում:
Գործակալության տվյալներով՝ Շոլցը ցանկանում է նաև օգտագործել հանդիպումը՝ նոյեմբերի 20-ին Բեռլինում կայանալիք միջազգային համաժողով նախապատրաստելու համար, որտեղ եվրոպացի և աֆրիկյան առաջնորդները ցանկանում են խթանել նախաձեռնությունը, որն ուղղված է աֆրիկյան երկրներում կայուն մասնավոր հատվածի ներդրումների պայմանների բարելավմանը, այդ թվում՝ ենթակառուցվածքում։
G20-ի հաջորդ գագաթնաժողովը կանցկացվի սեպտեմբերի 9-ից 11-ը Հնդկաստանի մայրաքաղաքում։ Ռուսաստանը համաժողովում կներկայացնի արտգործնախարար Սերգեյ Լավրովը, իսկ Չինաստանը՝ Չինաստանի Ժողովրդական Հանրապետության Պետական խորհրդի վարչապետ Լի Ցյան։
