2023թ. աշնանը կանցկացվեն պահեստազորայինների վարժական հավաքներ

2023 թվականի հոկտեմբերի 1-ից դեկտեմբերի 8-ը ներառյալ տեղի կունենան պահեստազորի առաջին խմբի առաջին և երկրորդ կարգերում հաշվառված շարքային, ենթասպայական և սպայական կազմերի պահեստազորայինների վարժական հավաքներ։

«Վարժական հավաքներ հայտարարելու և դրա ապահովման համար ռազմատրանսպորտային պարտականություններ ունեցող մարմինների տրանսպորտային միջոցները ներգրավելու մասին» այս որոշումն այսօր ընդունվել է ՀՀ կառավարության նիստում։

Վարժական հավաքներին ներգրավելու են մինչև 2059 քաղաքացու, որոնցից 1875-ը՝ շարքային և կրտսեր ենթասպայական կազմերի, 99-ը` ավագ ենթասպայական կազմի, 85-ը` սպայական կազմի պահեստազորայիններ՝ համազորային (մոտոհրաձգային, կապի, հետախուզական, ինժեներական), հրթիռահրետանային մասնագիտություններով։

Ընդ որում, այդ ընթացքում ռազմատրանսպորտային պարտականություններ ունեցող մարմիններից ներգրավելու են մինչև 152 միավոր տրանսպորտային միջոց։