Լուիս Ռուբիալեսը հայտարարել է իր հրաժարականի մասին

Իսպանիայի թագավորական ֆուտբոլի ֆեդերացիայի նախագահ Լուիս Ռուբիալեսը երկար դիմադրությունից հետո կիրակի օրը՝ սեպտեմբերի 10-ին, հայտարարել է իր հրաժարականի մասին։

Անգլիացի հեռուստալրագրող Պիրս Մորգանին տված հարցազրույցում Ռուբիալեսն ասել է, որ հեռանում է, քանի որ չի կարողանում շարունակել իր աշխատանքը:

Մի քանի օր առաջ Հերմոսոն բողոք էր ներկայացրել 46-ամյա Լուիս Ռուբիալեսի դեմ։ Ըստ դրա՝ դատախազները նրան մեղադրանք են առաջադրել սեռական ոտնձգության մեջ։

Սեպտեմբերի 10-ի երեկոյան իսպանական լրատվամիջոցները հրապարակել են Ռուբիալեսի նամակը Իսպանիայի ֆուտբոլի ֆեդերացիային, որում նա հայտարարել է Եվրոպական ֆուտբոլային ասոցիացիաների միության (ՈՒԵՖԱ) փոխնախագահի դեսպանի պաշտոնից հեռանալու մասին։

«Ինձ կասեցնելու ՖԻՖԱ-ի արագ որոշումից և իմ դեմ հարուցված այլ ընթացակարգերից հետո ակնհայտ դարձավ, որ ես չեմ կարողանա վերադառնալ իմ պաշտոնին։ Վերջնական որոշման սպասել պնդելը և սեփական պաշտոնից կառչելը ոչ մի դրական բան չի բերի ֆեդերացիային կամ իսպանական ֆուտբոլին»,- գրել է նա։

Նախկինում նախագահը հրապարակավ ներողություն էր խնդրել թույլ տված սխալի համար, սակայն կտրականապես մերժել էր հրաժարական տալու հնարավորությունը։ Իսպանիայի հավաքականի ֆուտբոլիստները ի նշան բողոքի գործադուլ էին հայտարարել, իսկ նրանց գլխավոր մարզիչ Խորխե Վիլդան որակազրկվել էր Ռուբիալեսի հետ սերտ կապերի պատճառով։

Հիշեցնենք, որ կանանց աշխարհի առաջնության եզրափակչում հաղթանակ տանելուց հետո, Իսպանիայի թագավորական ֆուտբոլի ֆեդերացիայի (RFEF) ղեկավար Լուիս Ռուբիալեսը խաղի ավարտին համբուրել է աշխարհի չեմպիոն Ջենի Հերմոսոյին։ Այս քայլը մեծ սկանդալ է առաջացրել ոչ միայն Իսպանիայում, այլև ֆուտբոլի ասպարեզում։