Ռուսաստանի ու Ադրբեջանի միջև բանակցություններ են ընթանում. Աբրահամյան
Նմանատիպ
Արցախի ու Ռուսաստանի, Ռուսաստանի ու Ադրբեջանի միջև բանակցություններ են ընթանում հնարավորինս սեղմ ժամկետում Լաչինի միջանցքը վերագործարկելու ուղղությամբ։ Այս մասին Ազգային ժողովում լրագրողների հետ զրույցում ասել է «Պատիվ ունեմ» խմբակցության քարտուղար Տիգրան Աբրահամյան։
Աբրահամյանն ընդգծել է, որ թեպետ Ակնա–Ստեփանակերտ ուղղությամբ ռուսական Կարմիր խաչի բեռնատարը կարողացել է մուտք գործելու Արցախ, սակայն Արցախի հիմնական սնուցման ուղին պետք է լինի Լաչինի միջանցքը:
«Եթե Ադրբեջանը կարճ ժամանակում այս քայլերը չիրականացնի, շատ ավելի համոզիչ կդարձնի արցախյան կողմի այն պնդումները, որ ստեղծված իրավիճակում Ադրբեջանն է ապակառուցողական դիրք ընդունել, և Ադրբեջանն ագրեսոր է ու փորձում է օգտագործել ցանկացած իրավիճակ` որոշիչ գործոն դարձնելով ուժի կիրառումը»,- ընդգծել է Աբրահամյանը։
Անդրադառնալով համացանցում տարածված տեղեկությանը, թե իբր ռուսական Կարմիր խաչի բեռնատարերը միայն վերմակ են տեղափոխել, նա նշեց, որ դա իրականությանը չի համապատասխանում։
Աբրահամյանը նաև հիշեցրել է, որ ադրբեջանական կողմը երկար ժամանակ պնդում էր, որ Ակնա–Ստեփանակերտ ճանապարհով մուտք պետք է գործի ոչ թե ռուսական կողմի մեքենան, այլ ադրբեջանական Կարմիր մահիկի, սակայն նման պնդումները, փաստացի,այս փուլում հնարավոր է եղել կանխել։
«Արցախի տեղեկատվական շտաբը, որը հրապարակել է տեղեկությունը, ընդգծել է, որ սա տեղի է ունեցել Ռուսաստանի հայտնի նախաձեռնության շրջանակներում։ Սրա հետ կապված մի քանի օր է` տեղեկություն եղել է, ու սա ենթադրում է կարճ ժամանակ հետո Լաչինի միջանցքի վերագործարկումը»,–հավելել է նա։
