Ոստիկանները բերման են ենթարկում քաղաքացիներին․ նրանց թվում է Լևոն Քոչարյանը

Երևանի տարբեր վարչական շրջաններում շարունակվում են անհնազանդության ակցիաները` ցուցարարները շարունակում են փողոցներ փակել։

Այս պահին փակ են Սարյան և Թումանյան փողոցները, Կոմիտասի պողոտա-Գյուլբենկյան փողոցի խաչմերուկը, Բաղրամյան պողոտան։ Ուսանողները Կոմիտասի պողոտայից երթով շարժվում են դեպի Հանրապետության հրապարակ, իսկ Սարյան փողոցի մեջտեղում աղբամաններ են դրվել։

Վարորդներից շատերը ազդանշաններ են տալիս ցուցարարներին` այսպիսով աջակցություն հայտնելով նրանց։ Քաղաքացիները բողոքի ակցիայի են եկել Հայաստանի և Արցախի դրոշներով։

Նշենք, որ քիչ առաջ փակ էր նաև Ամիրյան փողոցը, սակայն կարմիր բերետավորներն այնտեղից բերման ենթարկեցին ցուցարարների մի մասին` բիրտ ուժ կիրառելով։ Նրանց թվում էր նաև ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը։