Ադրբեջանը հրաժարվում է վերադարձնել հայ ռազմագերիներին․ Սիմոնյան

2020 թվականի պատերազմից հետո Ադրբեջանը հրաժարվում է վերադարձնել հայ ռազմագերիներին և այլ քաղաքացիական անձանց՝ ի հեճուկս Մարդու իրավունքների եվրոպական դատարանի որոշման: Այս մասին հայտարարել է ՀՀ ԱԺ նախագահ Ալեն Սիմոնյանը ԵԽ նախագահների համաժողովում իմ ելույթում, հայտնում է ԱԺ նախագահի մամուլի քարտուղար Ծովինար Խաչատրյանը։

«Ավելին, դատարանի որոշումից հետո Ադրբեջանը Հայաստանի տարածքից առևանգել է 2 հայ զինծառայողի, ինչի հետևանքով հաստատված ռազմագերիների ընդհանուր թիվը հասել է 35-ի»,-ասել է Սիմոնյանը:

Նա ընդգծել է, որ Ադրբեջանի գործողությունները չեն սահմանափակվում Լեռնային Ղարաբաղով, այլ տարածվում են Հայաստանի ինքնիշխան տարածքների վրա, որոնց մի մասը մնում է Ադրբեջանի վերահսկողության տակ:

«Հարգելի գործընկերներ, ես չզարմացա, որ թուրք գործընկերը հավանություն տվեց Լեռնային Ղարաբաղի հայերի դեմ ռազմական ուժի կիրառմանը։ Ես չեմ զարմանում, որ Թուրքիան, Ադրբեջանը և Ռուսաստանը հաճախ օգտագործում են նույն հռետորաբանությունը։ Ինձ զարմացնում է այն, որ նրանք դա անում են այստեղ՝ Մարդու իրավունքների պաշտպանության համար հիմնադրված կազմակերպությունում»,-ասել է նա:

Սիմոնյանը վստահեցրել է, որ Հայաստանը շարունակում է հավատարիմ մնալ տարածաշրջանում արդար և հարատև խաղաղության հասնելուն։

«Հուսով ենք, որ հոկտեմբերի 5-ին Իսպանիայի Գրանադա քաղաքում կայանալիք Եվրոպական քաղաքական համայնքի երրորդ գագաթնաժողովի շրջանակում Հայաստանի, Ադրբեջանի, Գերմանիայի, Ֆրանսիայի և ԵՄ առաջնորդների հանդիպումը մեկ քայլ առաջ կլինի: Հայաստանը վճռականորեն աջակցում է վարչապետ Փաշինյանի և նախագահ Ալիևի կողմից համաձայնեցված և Եվրոպական խորհրդի նախագահ Շառլ Միշելի կողմից ձևակերպված խաղաղության մոտեցմանը»,-նշել է ԱԺ նախագահը:

Նա ընդգծել է, որ ՀՀ-ն ողջունում է ապագա տրանսպորտային համաձայնագրերը, որոնք հարգում են ինքնիշխանության, իրավասության և փոխադարձության սկզբունքները: Սիմոնյանը կոչ է արել միջազգային հանրությանը, այդ թվում՝ Եվրոպայի խորհրդին, աջակցել այս գործընթացին: