Իսրայելը հարվածներ է հասցրել Դամասկոսի և Հալեպի օդանավակայաններին

Իսրայելը հարվածել է Դամասկոսի և Հալեպի օդանավակայաններին։Այս մասին հայտնում է Al Watan թերթը։

Նախնական տվյալներով՝ դադարեցվել է երկու օդանավակայանների աշխատանքը։ Ինչպես նշում է թերթը, հակաօդային պաշտպանությունը գործում է Դամասկոսի միջազգային օդանավակայանի շրջակայքում։ Սիրիական հեռուստատեսությունն իր հերթին հաստատել է հարվածների փաստը։

Իսրայելի պաշտպանության բանակի ներկայացուցիչները դեռ չեն մեկնաբանել այս տեղեկությունը։ Ըստ իսրայելական 13 հեռուստաալիքի, օդային նավահանգիստներին հասցված հարվածներից հետո Սիրիա մեկնող իրանական բեռնատար ինքնաթիռը, որի վրա ենթադրաբար զենք է եղել, շրջվել է։

SANA-ի փոխանցմամբ՝ հարձակման հետևանքով խափանվել են Դամասկոսի և Հալեպի օդանավակայանները։ Արաբական Հանրապետության ուժային կառույցներում գործակալության աղբյուրի համաձայն՝ մոտավորապես ժամը 13:50-ին Իսրայելի զինված ուժերը միաժամանակ հրթիռային հարվածներ են հասցրել միջազգային այս օդանավակայաններին։ Հրթիռակոծությունը վնասել է օդանավակայանի թռիչքուղիները։

«Այս ագրեսիան իսրայելական թշնամու հուսահատ փորձն է՝ ուշադրությունը շեղելու Գազայի հատվածում կատարվող հանցագործություններից և պաղեստինյան դիմադրության պատճառով կրած ծանր կորուստներից», – ասել է անանուն աղբյուրը։