ՄԱԿ-ի դատարանում կայացել է ԼՂ-ի վերաբերյալ լսումները

Ադրբեջանը ՄԱԿ-ի Միջազգային դատարանում Հայաստանի հայցի վերաբերյալ լսումների ժամանակ խոստացել է ապահովել Լեռնային Ղարաբաղի բնակիչների մարդասիրական կարիքները, անվտանգությունն ու իրավունքները՝ անկախ նրանց էթնիկ պատկանելությունից: Այս մասին հայտարարել է դատարանում ադրբեջանական պատվիրակության ներկայացուցիչ, փոխարտգործնախարար Էլնուր Մամեդովը։

Հոկտեմբերի 12-ին Հաագայում ՄԱԿ-ի Միջազգային դատարանում լսումներ են անցկացվում Լեռնային Ղարաբաղում իրավիճակի պատճառով ռասայական խտրականության մասին կոնվենցիայի վերաբերյալ Ադրբեջանի դեմ Հայաստանի հայցի վերաբերյալ:

Մամեդովի խոսքով` Ադրբեջանը պարտավորվում է անել հնարավոր ամեն ինչ (առանց ազգային կամ էթնիկ պատկանելության տարբերության), որպեսզի ապահովի Լեռնային Ղարաբաղի բնակիչների անվտանգությունը` ներառյալ նրանց մարդասիրական կարիքները, այդ թվում ՝ նրանց պարենով, դեղորայքով և առաջին անհրաժեշտության այլ պարագաներով ապահովման միջոցով:

Նա նաև նշել է, որ Բաքուն պարտավորվում է ապահովել Լեռնային Ղարաբաղի բնակիչների ազատ տեղաշարժվելու և բնակվելու իրավունքը, այդ թվում ՝ բնակիչների անվտանգ և արագ վերադարձը իրենց տներ և տարածաշրջանից դուրս գալ ցանկացող ցանկացած բնակչի անարգել ելքը, ինչպես նաև Ղարաբաղը լքած անձանց գույքի պաշտպանությունը:

Բացի այդ, Մամեդովի խոսքով, Ադրբեջանը խոստանում է աջակցել ինչպես ՄԱԿ-ի տեսչությունների, այնպես էլ ԿԽՄԿ-ի հասանելիությանը Ղարաբաղին մարդասիրական օգնություն ցուցաբերելու նպատակով:

Հիշեցնենք` սեպտեմբերին Երևանը դիմել էր ՄԱԿ-ի դատարան՝ խնդրելով միջոցներ ձեռնարկել Լեռնային Ղարաբաղում տիրող իրավիճակի հետ կապված ռասայական խտրականությունը վերացնելու համար: Հայաստանն այն ժամանակ դատարանին խնդրել էր միջանկյալ միջոցներ ձեռնարկել Ադրբեջանի նկատմամբ։

Միջազգային իրավական հարցերով ՀՀ ներկայացուցիչ Եղիշե Կիրակոսյանը հոկտեմբերի 9-13–ը գործուղվել է Նիդեռլանդների Թագավորություն (Հաագա)՝ միջազգային հարթակում Հայաստանի շահերը ներկայացնելու համար։