Ադրբեջանի զորքերը «ոչնչացրել են» «Իսկանդերը» և «Տոչկա-Ու» համակարգերը

Ադրբեջանի և Թուրքիայի զինված ուժերը հոկտեմբերի 23-ին մեկնարկած համատեղ զորավարժությունների ընթացքում փորձարկել են արագ հարձակողական գործողությունների տարբեր սցենարներ: Երկու երկրների Արտաքին գործերի նախարարությունների տարածած հաղորդագրության համաձայն` «Մուսթաֆա Քեմալ Աթաթուրք – 2023» համատեղ զորավարժությունների երկրորդ օրը դաշնակից երկրների բանակային ստորաբաժանումները, անվտանգ անցումներ բացելով ականապատ տարածքներում, գրավել են պայմանական հակառակորդի պաշտպանական գիծը և նրա թիկունքում դեսանտային ուժ իջեցրել:

Զորավարժությունների երկրորդ օրը Ադրբեջանի և Թուրքիայի զինված ուժերի հրամանատարական ստորաբաժանումները համատեղ գործողություններ են իրականացրել՝ շփման գծին մոտենալու և պայմանական հակառակորդի տարածքի ուղղությամբ առաջխաղանցում գրանցելու համար։

Պայմանական հակառակորդի անօդաչու թռչող սարքերի ուղղությամբ ռադիոմիջամտությունների կիրառմամբ գործողություններ են իրականացվել՝ կանխելու հակաօդային պաշտպանության համակարգերի շահագործմանը խոչընդոտող քայլերը և ապահովելու ուղղաթիռների և ինքնաթիռների մարտական թռիչքների անվտանգությունը։

Նշենք, որ Բաքվում, Նախիջևանում և Արցախի օկուպացված տարածքներում անցկացվող զորավարժություններին, ընդհանուր առմամբ, ներգրավված է երկու երկրների տարբեր զորատեսակներից 3000 զինվորական, 130 միավոր զրահատեխնիկա, մինչև 100 հրետանային միջոց, ավելի քան 20 ավիացիոն և անօդաչու միջոցներ, ինժեներական տեխնիկա: Դատելով վարժանքների սցենարից, դրանք հարձակողական բնույթ ունեն։  

Առանձնահատուկ ուշադրություն է դարձվում «Իսկանդերի» և «Տոչկա-Ու»-ի ոչնչացմանն ուղղված գործողություններին, քանի որ Ռուսաստանից բացի, Հայաստանը տարածաշրջանում միակ երկիրն է, որը զինված է նշված համակարգերով։ Հետևաբար, ըստ ադրբեջանական լրատվամիջոցների, ադրբեջանա-թուրքական համատեղ զորավարժությունները կարելի է դիտարկել որպես քողարկված ուղերձ Հայաստանին։

Բացի այդ, նույն լրատվամիջոցների փոխանցմամբ, Թուրքիայի և Ադրբեջանի զինված ուժերի կողմից գետերի վրայով շարժական կամուրջների օպերատիվ կառուցման ուսուցումը կարելի է համարել ուղերձ, որն ուղղված է նաև Իրանին:

Հիշեցնենք, որ երբ Թեհրանի և Բաքվի միջև հարաբերությունները կտրուկ վատթարացան, Իրանի Իսլամական Հանրապետությունը լայնածավալ զորավարժություններ անցկացրեց Ադրբեջանի հետ սահմանին,որի ընթացքում Իսլամական հեղափոխության պահապանների կորպուսի ստորաբաժանումները փորձեցին Արազ գետի վրայով շարժական կամուրջներ դնել։