Մասկը մտադիր է մրցակցել YouTube-ի և LinkedIn-ի հետ

X (նախկին Twitter) սոցիալական ցանցի սեփականատեր Իլոն Մասկը մտադիր է ապագայում մրցակցել YouTube և LinkedIn սոցիալական ցանցերի հետ։ Այս մասին հայտնում է Bloomberg-ը:

Իլոն Մասկը և X-ի գործադիր տնօրեն Լինդա Յակարինոն ուշադրություն են հրավիրել «այս երկու կայքերի» վրա հինգշաբթի օրը կայացած սոցիալական ցանցի աշխատակիցների ընդհանուր ժողովում, որն ամփոփել է Մասկի կողմից Twitter-ը ձեռք բերելու մեկամյակը։

Գործակալության տվյալներով՝ նրանք հայտարարել են նաև XWire անունով լրատվական ծառայություն ստեղծելու մտադրության մասին, որը կմրցի Cision-ի PR Newswire լրատվական ծառայության հետ:

Bloomberg-ը նշում է, որ Մասկը և Յակարինոն չեն կիսվել թիմի հետ կոնկրետ գաղափարներով, թե ինչպիսի տեսք կունենան YouTube-ի և LinkedIn-ի հետ մրցակցելու համար նախատեսված միջոցները: Համաձայն X-ի աշխատակիցներին ուղարկված հուշագրի՝ ընկերությունը կարծում է, որ «այժմ պատրաստ է աճի», և հարթակը «ընդամենը 12 ամսում տասնամյակի նորարարություններով հանդես կգա»:

Հոկտեմբերի 26-ին Մասկը հայտարարել է X սոցիալական ցանցում աուդիո և տեսազանգերի գործառույթների հայտնվելու մասին։ Նախկինում նա հայտնել էր, որ այն հասանելի կդառնա iOS և Android հարթակներում, ինչպես նաև սովորական համակարգիչներում՝ ներառյալ Apple-ի արտադրանքները: