2024թ․-ի բյուջեի 42 տոկոսն ուղղվելու է պաշտպանության ոլորտին

2024թ․-ի բյուջեով նախատեսված կապիտալ ծախսերի 42 տոկոսը ուղղվելու է պաշտպանության ոլորտին։

Այս մասին այսօր ԱԺ–ի մշտական հանձնաժողովների համատեղ նիստում բյուջեի նախագծի ներկայացման ժամանակ հայտնել է ՀՀ ֆինանսների նախարար Վահե Հովհաննիսյանը` ներկայացնելով պաշտպանական ոլորտի ծախսերի բացվածքը։

«Պաշտպանության նախարարության ծախսերը 2024 թվականին կազմելու են 555 մլրդ դրամ, ինչը 7 տոկոսով ավելի է 2023 թվականից և կազմում է ՀՆԱ-ի 5.3 տոկոսը»,– ասել է Հովհաննիսյանը։

Նշենք, որ մինչ այդ վարչապետ Նիկոլ Փաշինյանը ԱԺ-ում հայտարարել էր, որ պաշտպանական ծախսերի աճի դինամիկան որևէ կերպ չի հակասում կառավարության կողմից հայտարարված խաղաղության օրակարգին։

Նրա խոսքով` 2024 թվականի բյուջեի ծախսերը պաշտպանության ոլորտում 2018 թվականի համեմատ գրեթե կրկնապատկվում են` ավելանալով 125 տոկոսով։