Սիրիական բանակը կարևոր դիրքեր է գրավել Թադմուրի շրջանում
Նմանատիպ
Սիրիական բանակը կարևոր դիրքեր է ազատագրել Թադմուրի շրջանում՝ իր վերահսկողության տակ վերցնելով բնական գազի և նավթի հորերը: Ինչպես հաղորդում է «Արմենպրես»-ը՝ վկայակոչելով սիրիական լրատվամիջոցները, Դամասկոսի մերձակայքում գտնվող Հարասթա գյուղում հրասանդներ են ընկել՝ պատճառելով նյութական վնասներ: Ոստիկանությունը տեղեկացրել է, որ հրասանդներն ընկել են թաղամասում գտնվող ռեստորանի մերձակայքում: Բարեբախտաբար, զոհեր և վիրավորներ չեն գրանցվել:
Ռազմական աղբյուրները տեղեկացրել են, որ տասնյակ զինյալներ են սպանվել Դամասկոսի Ջոբար թաղամասում: Զինյալների թաքստոցներ են ոչնչացվել Քաֆր Բատնա գյուղաքաղաքում, նաև Հալեպի գյուղերում և Համայում:
Սիրիական բանակի և զինյալների միջև թեժ մարտեր են ընթանում Համայի շրջանի Մուրք գյուղում:
«Ալ Ջազիրա»-ն տեղեկացնում է, որ կառավարական ուժերի 4 տասնյակ անդամ են զոհվել, երբ փորձել են հարձակվել Մուրք գյուղի վրա: Բացի այդ, ոչնչացվել են կառավարական ուժերին պատկանող տանկեր և այլ զենքեր:
Վիճակագրական տեղեկությունների համաձայն, 72 ժամվա ընթացքում սիրիական օդային ուժերը ավելի քան 127 օդային հարվածներ են հասցրել Մուրք գյուղին:
ՄԱԿ-ի տվյալներով, 3,5 տարվա բախումների ընթացքում Սիրիայում մոտ 200 հազար մարդ է զոհվել:
Հետևեք մեզ նաև Telegram-ում