ՀԱՊԿ–ի և ՄԱԿ–ի գլխավոր քարտուղարները հեռախոսազրույց են ունեցել

ՀԱՊԿ–ի գլխավոր քարտուղար Իմանգալի Տասմագամբետովը ՄԱԿ–ի գլխավոր քարտուղար Անտոնիու Գուտերեշի հետ քննարկել է կառույցների միջև փոխգործակցության հարցերի լայն շրջանակ։ Այս մասին հայտնել է ՀԱՊԿ մամուլի ծառայությունը։

Նշվում է, որ զրույցը տեղի է ունեցել տեսակոնֆերանսի ձևաչափով։

Կողմերն ընդգծել են տարածաշրջանային կանխարգելիչ գործունեության հաշվին անվտանգության ռազմավարական ռիսկերի նվազմանն ուղղված միջազգային համաձայնեցված քայլերի կարևորությունը։

Ուշադրություն է դարձվել ՀԱՊԿ քարտուղարության և ՄԱԿ–ի մասնագիտական կառույցների աշխատանքային շփումների հետագա զարգացմանը` ահաբեկչության դեմ պայքարի, թմրամիջոցների ապօրինի շրջանառության, միջսահմանային հանցագործությունների, անօրինական միգրացիայի, ինչպես նաև խաղաղապահության ոլորտում փոխգործակցության հարցերի շուրջ։

Նշվել է ահաբեկչական գաղափարախոսության տարածման և քարոզի դեմ պայքարի և տեղեկատվական անվտանգության ոլորտում ջանքերի միավորման կարևորությունը։ Կողմերը պայմանավորվել են շարունակել շփումը։