Ռուսաստանը 40 տոննա մարդասիրական օգնություն կուղարկի Հայաստան

Ռուսաստանը մոտ օրերս 40 տոննա մարդասիրական օգնություն կուղարկի Հայաստան։

Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Մենք աջակցում ենք Հայաստանին և Ղարաբաղի հայերին հումանիտար ոլորտում։ Հաշվի առնելով հայկական կողմի կարիքները` ՌԴ կառավարությունը 40 տոննա մարդասիրական օգնություն է ուղարկելու Հայաստան», – ասել Է Զախարովան։

Նրա խոսքով՝ մարդասիրական բեռը կներառի շարժական էլեկտրակայան, որը կարող է 10 տուն մատակարարել էներգիայով։ Պատրաստվող մարդասիրական ակցիան լրացնում է ղարաբաղյան վերաբնակիչներին աջակցելու ուղղությամբ ռուսական կողմից արդեն իսկ ձեռնարկված քայլերի շարքը:

Նա հիշեցրել է, որ «Ռուսական մարդասիրական առաքելություն» ՀԿ-ն արդեն Հայաստան է ուղարկել 6 տոննա սննդամթերք՝ 500 մթերային հավաքածու, 500 անձնական հիգիենայի փաթեթ, կենցաղային քիմիկատներ։

Բացի այդ, ՌՄԱ–ն Երևանում «Ռոսսոտրուդնիչեստվոյի» ներկայացուցչության հետ համատեղ ցուցաբերում է և բարոյական և հոգեբանական օգնություն։ Իսկ «Դոկտոր Լիզա» բարեգործական հիմնադրամը ավելի քան 20 տոննա մարդասիրական օգնություն է ուղարկել Հայաստան։