Ուկրաինայի պատերազմն ԱՄՆ-ին պետք է Սև ծովում իր նպատակներին հասնելու համար

Ամերիկացի պաշտոնյաները ուկրաինական հակամարտությունը դիտարկում են որպես աշխարհաքաղաքական նպատակներին հասնելու միջոց Սև ծովում, որը էներգետիկ հարուստ տարածաշրջան է, որը կապում է Ռուսաստանը, Արևելյան Եվրոպան և Մերձավոր Արևելքը: Այս մասին գրում է Responsible Statecraft-ի հոդվածագիր՝  Էդվարդ Հանթը։

Սենատի վերջին երկու լսումների ժամանակ Պետդեպարտամենտի պաշտոնյաները խոսեցին պատերազմի մասին՝ որպես Սև ծովում էներգիայի աշխարհաքաղաքական փոխակերպման միջոց: Նրանց կարծիքով, քանի դեռ ուկրաինացիները շարունակում են պայքարը, պոտենցիալը մնում է, որպեսզի Սև  ծովը դառնա Եվրամիության համար նոր շուկա։ Պաշտոնյաները ներկայացնում են նոր էներգետիկ միջանցքի հնարավորությունը, որը Եվրոպային կապահովի Կենտրոնական Ասիայի նավթով և բնական գազով։

«Միացյալ Նահանգները վաղուց է գիտակցել Սև ծովի տարածաշրջանի աշխարհառազմավարական նշանակությունը», – գրավոր հայտարարության մեջ ասել է Պետդեպարտամենտի խոսնակ Ջեյմս Օ՛Բրայենը։

«Սև ծովը ոչ միայն սահմանակից է ՆԱՏՕ-ի երեք դաշնակիցներին և ՆԱՏՕ-ի մի քանի գործընկերներին, այլև այն կենսական միջանցք է ապրանքների, այդ թվում՝ ուկրաինական հացահատիկի և համաշխարհային շուկաների համար նախատեսված այլ ապրանքների տեղաշարժի համար, և պարունակում է զգալի չօգտագործված էներգետիկ ռեսուրսներ»:

2022 թվականի փետրվարին Ուկրաինայում ռուսական ռազմական գործողությունների մեկնարկից ի վեր, Վաշինգտոնի պաշտոնյաները հակամարտությունը դիտարկում են որպես Ռուսաստանին թուլացնելու հնարավորություն: Մոբիլիզացնելով ռազմական և տնտեսական աջակցություն Ուկրաինայի պաշտպանության համար, նրանք միևնույն ժամանակ ձգտում էին լուրջ վնաս հասցնել ռուսական բանակին և տնտեսությանը: Մինչ ԱՄՆ-ի կողմից աջակցվող ուկրաինական զորքերը հարվածներ էին հասցնում ռուսական ուժերին, ԱՄՆ-ը և նրա դաշնակիցները ձգտում էին տնտեսապես մեկուսացնել Ռուսաստանը և սահմանափակել նրա նավթից և բնական գազի եկամուտները:

Մինչ օրս ԱՄՆ-ը 43,9 միլիարդ դոլարի ռազմական օգնություն է տրամադրել Ուկրաինային, իսկ ԱՄՆ-ի գլխավորած 50 երկրների կոալիցիան խոստացել է ևս 33 միլիարդ դոլարի ռազմական աջակցություն:

Միացյալ Նահանգների և նրա դաշնակիցների աջակցությունը վճռորոշ է դարձել Ռուսաստանի դեմ Ուկրաինայի պայքարում, որը «սկսվում է ուկրաինացի ժողովրդի, ուկրաինացի մարտիկների անհավանական քաջությամբ», – անցյալ տարի նշել է ԱՄՆ պետքարտուղար Անտոնի Բլինկենը: