«Հայաստան» համահայկական հիմնադրամը հավաքագրել է շուրջ 8,4 մլն դոլար

«Հայաստան» համահայկական հիմնադրամի` նոյեմբերի 23-ին մեկնարկած 26-րդ հեռուստամարաթոնի ընթացքում այս պահի դրությամբ հավաքագրվել է շուրջ 8,4 միլիոն ԱՄՆ դոլար: Այս մասին հայտնում է «Հայաստան» համահայկական հիմնադրամը:

Նշվում է, որ հեռուստամարաթոնի խորագիրն է «Քեզ համար, Հայաստան»։

««Հեռուստամարաթոն 2023»–ի շրջանակում Հայաստանում հանգանակվել է 552,372 ԱՄՆ դոլար, Ֆրանսիայի տեղական մարմինը հավաքագրել է 3,250,000 ԱՄՆ դոլար, ԱՄՆ տեղական մարմինը՝ 3,100,000 ԱՄՆ դոլար, Տորոնտոյի (Կանադա) տեղական մարմինը՝ 500,000 ԱՄՆ դոլար, Մեծ Բրիտանիայի տեղական մարմինը՝ 450,000 ԱՄՆ դոլար, Արգենտինայի տեղական մարմինը՝ 160,690 ԱՄՆ դոլար»,– նշված է հաղորդագրության մեջ։

Բացի այդ, նվիրատվություններ են կատարվել Նիդեռլանդներից՝ 100,000 ԱՄՆ դոլար, Բրազիլիայից՝ 92,000 ԱՄՆ դոլար, Գերմանիայից՝ 66,400 ԱՄՆ դոլար, Շվեյցարիայից՝ 50,000 ԱՄՆ դոլար, Ավստրալիայից՝ 27,000 ԱՄՆ դոլար, Ավստրիայից՝ 25,900 ԱՄՆ դոլար, Ռումինիայից՝ 4,360 ԱՄՆ դոլար։

«Քեզ համար, Հայաստան» խորագրով հեռուստամարաթոնի դրամական միջոցները կուղղվեն Արցախից բռնի տեղահանված մեր հայրենակիցների կենսապայմանների բարելավմանը, ինչպես նաև սահմանային համայնքների զարգացմանն ուղղված ծրագրերի ֆինանսավորմանը:

Դրամահավաք–միջոցառումները դեռ շարունակվում են, իսկ վերջնական արդյունքները կամփոփվեն տարեվերջին: Նշենք, որ նվիրաբերություններ կարելի է կատարել հիմնադրամի առցանց հարթակում։

Հիշեցնենք` 2022 թվականի նոյեմբերի 24-ին «Մենք ստեղծում ենք կենսունակ համայնքներ» խորագրի ներքո տեղի ունեցած «Հայաստան» համահայկական հիմնադրամի 25-րդ հեռուստամարաթոնի ընթացքում հավաքագրվել էր ավելի քան 11 միլիոն ԱՄՆ դոլար։