Ամերիկահայ Պաոլո Պիրջանյանի արտադրած ռոբոտը գլխավոր մրցանակ է ստացել Լաս Վեգասում

Ամերիկահայ Պաոլո Պիրջանյանի «Embodied» ընկերության արտադրած Մոքսի ռոբոտը Լաս Վեգասի CES 2024 սպառողական էլեկտրոնիկայի միջազգային ցուցահանդեսի նորարարական մրցանակաբաշխությունում «Արհեստական բանականություն» անվանակարգում ստացել է գլխավոր մրցանակը: Տեղեկությունը հայտնում է ՀՀ բարձր տեխնոլոգիական արդյունաբերության նախարարությունը։

Նշվում է, որ Մոքսի ռոբոտը ստեղծվել է 2016 թվականին ու իր արհեստական բանականությամբ հեղափոխական տեխնոլոգիա է համարվում երեխաների զարգացման ոլորտում:

«Ռոբոտը նախատեսված է ֆիզիկական և այլ խնդիրներ ունեցող 5-10 տարեկան երեխաների համար: Մոքսին սովորեցնում է երեխաներին շփվել՝ զարգացնելով նրանց էմոցիոնալ որակները: Օգտագործելով առաջադեմ տեխնոլոգիաներ, արհեստական բանականություն՝ Մոքսին ցուցաբերում է ամբողջական մոտեցում, որն օգնում է երեխային խաղի միջոցով սովորել զարգացման հիմնական հմտությունները»,– ասվում է հաղորդագրությունում։

Ռոբոտը նաև թույլ է տալիս հավելվածի միջոցով հետևել երեխայի զարգացման փուլերին: