Ադրբեջանի գազը պետք է, բայց չի կարելի աչք փակել հայերի դեմ ագրեսիայի վրա

Ադրբեջանի գազը մեզ պետք է, բայց աչք փակել հայերի դեմ ագրեսիայի վրա չի կարելի։ Հայտարարել է Ֆրանսիայի սենատորը։

Հայկական հարցը ֆրանսիական հարց է։ Այս մասին ասել է սենատոր Բրյունո Ռետայոն՝ Ֆրանսիայի Սենատի՝ Հայաստանին աջակցող և Ադրբեջանի նկատմամբ պատժամիջոցներ պահանջող բանաձևի քննարկման ժամանակ։

Խոսելով Ալիևի ռեժիմի մասին՝ Ռետայոն նշել է․ «Սուտն ու բռնակալությունը գնում են ձեռք ձեռքի տված»,- ասել է Ռետայոն՝ հավելելով, որ Բաքվի դիրքորոշումը ցեղասպանության ժխտումն է՝ գնահատելով դա որպես էքսպանսիոնիզմ։

«Ալիևն անընդհատ ասում է, որ Երևանը հայերի կողմից գողացված ադրբեջանական քաղաք է», – գործընկերներին դիմելով հավելել է նա:

Խոսելով Ադրբեջանի կողմից Ֆրանսիային մատակարարվող գազի մասին, սենատոր  Ժան-Պիեր Ռոշետը շեշտել է․ «Այն, որ ադրբեջանական գազը մեզ անհրաժեշտ է, չի նշանակում, որ մենք պետք է աչք փակենք հայերի դեմ Ադրբեջանի ագրեսիայի վրա։ Հայաստանն ապրում է Ադրբեջանի մշտական սպառնալիքի ներքո: Բանաձևը կապահովվի Հայաստանի անվտանգությունն ու ԼՂ-ում հայկական մշակութային ժառանգության պահպանումը»։