ՌԴ-ի և Թուրքիայի միջև դրամական փոխանցումները 2024-ի սկզբից գրեթե չեն իրականացվել

Թուրք արտահանողները բախվում են այն խնդրին, որ բանկերը հրաժարվում են մշակել Ռուսաստանից դրամական փոխանցումները, որոնք նախատեսված են ապրանքների մատակարարման համար։ Այս մասին հայտնում է Ekonomim-ը՝ հղում անելով գործարար համայնքի աղբյուրներին։

Խնդիրը սկսել է լրջանալ 2023 թվականի դեկտեմբերին։ Հետո շատ արտահանողներ սկսեցին դժգոհել, որ չեն կարողանում Ռուսաստանից վճարումներ ստանալ թուրքական լիրայով և ռուբլով։ Նման փոխանցումները կա՛մ ուղղակիորեն հետ են ուղարկվել որոշ մասնավոր բանկերի կողմից, կա՛մ մերժվել են գործարքի սկզբնական փուլում՝ իբր այն պատճառով, որ վճարումը կատարվել է պատժամիջոցների տակ գտնվող ապրանքների համար։

Ըստ թերթի՝ հունվարի 1-ից նման տրանսֆերտները գրեթե դադարել են: Այս իրավիճակը մեծ հարված է հասցնում արտահանմանը, և տնտեսվարողները սպասում են հրատապ լուծումների՝ Ռուսաստանի Դաշնությունում առևտուրը շարունակելու համար։

Ուկրաինայի հակամարտության և ԵՄ-ի ու ԱՄՆ-ի պատժամիջոցների ֆոնին Թուրքիայի և Ռուսաստանի միջև առևտրի ծավալը, ինչպես նշում է Ekonomim-ը, աճում է։ 2023 թվականին թուրքական արտահանումը Ռուսաստան աճել է 23.2%-ով՝ մինչև 9.4 միլիարդ դոլար՝ 2022 թվականի համեմատ։ Առաջատար արտահանողներն են քիմիական արդյունաբերությունը, մեքենաշինությունը, ավտոմոբիլաշինությունը, գյուղատնտեսությունը, էլեկտրոնիկան: Այս ոլորտների որոշ ներկայացուցիչներ թերթին ասել են, որ իրենց առջև ծառացել է ապրանքների վճարման համար փոխանցված միջոցների պակասի կամ իսպառ բացակայության խնդիր։ Խնդիրներ կան նաև ծովային փոխադրումների ոլորտում, որտեղ Ռուսաստանի Դաշնություն ապրանքներ առաքող նավատերերը նույնպես հայտնում են վճարման հետ կապված խնդիրների մասին։

Թերթը գրում է, որ տրանսֆերտների հետ կապված խնդիրները կարող են կապված լինել արևմտյան պատժամիջոցների ընդլայնման և թուրքական բանկերի ու միջնորդների՝ երկրորդական պատժամիջոցների ենթարկվելու մտավախությունների հետ։