Կարմիր ծովում ճգնաժամի պատճառով Եվրոպայում գները կփոխվեն

Տարբեր տեսակի ապրանքները, որոնք Ասիայից Եվրոպա են մատակարարվում կոնտեյներային նավերով, Կարմիր ծովում ճգնաժամի պատճառով կարող են մինչև 10 տոկոս թանկանալ։ Այս մասին գրել է իտալական il Messaggero թերթը:

«Կարմիր ծովի հարկը» վերաբերում է էլեկտրոնիկային, ինտերիերի և նորաձևության իրերին, ավտոպահեստամասերին և նույնիսկ Մերձավոր Արևելքից գազի մատակարարմանը, նշում է պարբերականը:

Այսպես, Շանհայից Ջենովա ծովային կոնտեյների փոխադրման արժեքն աճել է 360 տոկոսով՝ հասնելով 6300 դոլարի։ Միջազգային քաղաքական հետազոտությունների իտալական ինստիտուտի (ISPI) գնահատականներով՝ փոխադրումների հետ կապված դժվարությունները սպառնում են Կատարից հեղուկ գազի տարանցմանը, ինչի ապացույցն արդեն նավի ուշացումն է, որը պետք է ժամաներ Վենետոյի հյուսիսային շրջանի նավահանգիստ:

Ինչպես հայտնել է նույն ինստիտուտը, Կարմիր ծովում տիրող իրավիճակի պատճառով Եվրոպայում սպառողական գների ինդեքսն այս տարի կարող է 1,8 տոկոսային կետով բարձր լինել, քան ճգնաժամից զերծ իրավիճակներում:

Ինչպես գրում է il Messaggero-ն, գների բարձրացման հետ կապված տագնապից արդեն տուժել են մանրածախ առևտրականները, խոշոր ավտոարտադրողները, հագուստի և կահույքի արտադրողները: Փորձագետների գնահատմամբ՝ թանկացումների վրա կարող են ազդել նաև արտադրողների և առևտրականների կողմից շահարկումները: